Sony: компьютерда видеоўйинларни масофали ўйнаш учун расмий дастур яратилмоқда
Видеоўйинларни бир вақтнинг ўзида компьютерларда ўйнашни таъминловчи Remote Play PC дастури бир неча кун илгари номаълум дастурчилар томонидан ишлаб чиқилиб, интернет тармоғига жойлаштирилган эди. Видеоўйинларни PS4 приставкасидан компьютерга масофали трансляция қилувчи Remote Play PC’нинг норасмий, пуллик иловасига нисбатан оз фурсатда юзлаб муносабат ва шарҳлар билдирилгани Sony компаниясининг эътиборидан четда қолмади.
Компания тез орада худди шундай дастурнинг Mac ҳамда Windows компьютерларига мўлжалланган расмий талқинини юклаб олиш мумкинлигини эълон қилди. Бу тўғрида Sony таркибида видеоўйинлар ишлаб чиқиш билан шуғулланувчи SCE Worldwide Studios компанияси президенти Шуҳей Йошида ўзининг Twitter’даги саҳифасида эълон қилган.
“Одамлар биздан ўйинларни компьютерларда масофали ўйнаш функциясини яратиш режамиз бор-йўқлигини сўрашди. Ва, албатта, биз PC ва Mac компьютерлари учун расмий дастур устида ишлаяпмиз.”
Жаноб Шуҳей дастурнинг қайси санада тақдим этилиши ҳақида маълумот бермаган.
Аслида бу технология Sony учун янгилик эмас. PlayStation Vita қурилмаси ва компаниянинг телефонлари орқали ўйинларни масофали ўйнаш имкони мавжуд эди. Шунингдек, видеоўйинларни бошқа хоҳлаган телевизорларда ўйнаш мумкин. Янги дастур телевизорингиз ҳам банд бўлган тақдирда, ўйинларни компьютерда ўйнаш имконини яратди.
Шунингдек, мазкур хабар компания Bluetooth ва USB тизимида ишлайдиган приставка бошқарув пультини компьютерларга мувофиқ такомиллаштиришини ҳам англатади.
