Synaptics ҳимоя экранига созланадиган оптик бармоқ изи сканерини яратди

Смартфондаги технологияларнинг шиддат билан такомиллашиб бораётгани ҳеч кимга сир эмас. Жумладан, бармоқ изини таниш технологияси ҳам жорий усуллардан фарқ қилиши ҳақида турли миш-мишлар тарқалганига ҳам анча бўлди.

Куни кеча АҚШнинг смартфонлар учун ҳимоя инновацияларини яратадиган Synaptics компанияси Natural ID биометрик тасдиқлаш функциясига эга оптик бармоқ изи сканерини тақдим қилди. Датчик Natural ID FS9100 номи билан юритилади, уни 1 мм қалинликка эга смартфоннинг олд панелидаги шиша остига жойлаш мумкин. Яъни ушбу технология эндиликда бармоқ изи сканерларини механик босма тугмага эмас, балки шиша устига оптик усулда ўрнатиш имкониятини беради. Ишлаб чиқарувчининг қайд этишича, мазкур сенсорнинг тўғри ишлаши учун смартфон  2.5D шишаси билан жиҳозланган бўлиши лозим.

IXBT сайтининг маълум қилишича, датчик бармоқ изини ҳатто нам бармоқларда ҳам таниш хусусиятига эгадир. Шунингдек, у қалбаки бармоқ изларини аниқлашга хизмат қиладиган бир қатор бошқа технологиялар билан ҳам қувватланган.

Тез орада ушбу янгилик кўплаб смартфонларда пайдо бўлиши мумкин.