ТОП-10: AnTuTu талқинида мартдаги энг зўр Android-смартфонлар

AnTuTu компанияси ҳар ойда самарадорлиги энг юқори бўлган смартфонлар рўйхатини эълон қилади. Бу рейтингни шакллантиришда ушбу сервис бенчмаркида синаб кўрилган қурилмаларнинг кўрсаткичлари асос сифатида олинади.

Ўтган галги – февраль ойидаги рейтингда дастлабки учта ўринни Huawei компаниясининг смартфонлари эгаллаган эди. Аммо кўплаб янги смартфон моделлари бозорга чиққани сабабли март ойида умумий вазият анча ўзгарди.

ЎҚИНГ: Энг кучли Android-смартфонлар (февраль бўйича AnTuTu талқини)

Таниқли бенчмарк сервисидаги натижаларга кўра мазкур компания янги рейтингни тақдим этди. Унга кўра, март ойининг энг қудратли Android-смартфонлари жанубий кореялик техногигантнинг Galaxy S9+ ҳамда Galaxy S9 (Snapdragon 845 чипли) моделлари бўлиб чиқди. Мазкур икки флагман тестларда тегишлича 264402 ва 263754 балл тўплашган.

Улар ортидан эса дунёнинг учинчи рақамли смартфонсозининг флагманлари – Huawei Mate 10 ҳамда Mate 10 Pro моделлари келаётир. Бу иккалови ҳамда кучли бешликни якунлаб берган Honor V10 смартфони Kirin 970 процессори базасида ишлайди.

Навбатдаги поғоналарни Snapdragon 835 чипи базасидаги OnePlus 5/5T телефонлари, кейинги ўринларни эса Nubia Z17/Z17s моделлари эгаллаган. Топ-ўнталикни Xiaomi Mi 6 флагмани тугаллаб берган.

Умуман олганда, мазкур рейтинг натижалари шунақа бўлиши олдиндан маълум эди. Зеро, ҳали яқинда расман намойиш этилган Huawei P20 ва P20 Pro, шунингдек Xiaomi Mi MIX 2s моделлари бенчмарк рейтингига кириб улгурмаган. Демак, кейинги ойда майдонга янги флагманлар кириб келади ва жанг қизғин бўлади.

ЎҚИНГ: Янги рекорд: йилнинг энг тезкор смартфони AnTuTu’да 356 918 балл тўплади!