Топ-7: Ўзбекистонда бозори чаққон смартфонлар, уларнинг нархлари (2018 йил, 14 февраль)
Айни пайтда Ўзбекистонда ҳам смартфон савдоси жадал ривожланиб, янги модел ва брендларга бўлган эҳтиёж мунтазам юқорилаб бормоқда. Турли-туман брендлар – Apple, Xiaomi, HTC, Samsung, Sony, LG, Meizu, Huawei ва бошқалар мазкур бозор учун оммабоп смартфонларни етказиб бермоқдалар.
Айрим харидорлар ишончни оқлаган брендларни маъқул қўраётган бўлишса, аксарият инсонлар янги, бироқ ҳамёнбоп брендларнинг "ақлли телефон"ларини харид қилишмоқда. Кимгадир замонавий дизайн ва ҳашамдор смартфонлар ёқади. Биз қуйида ҳозирда Ўзбекистон смартфон бозорида яхши сотилаётган смартфон моделларини эълон қилмоқчимиз.
Мазкур рейтингни шакллантиришда ўзимиз ҳамкорлик қилаётган йирик дўконлар, ҳамкорлар, жумладан интернет дўконларининг маълумотларига таянганмиз.
2018 йилнинг февраль ҳолатида Ўзбекистон смартфон бозорида эҳтиёж энг юқори бўлган смартфон -- Xiaomi Redmi 4X.
Айнан мана шу мобил алоқа воситаси смартфон бозорига ташриф буюраётган харидорлар диққат-марказида турибди. Айни пайтда мазкур моделни пойтахтимиздаги электроника дўконларидан 1 095 000 сўмдан бошлаб харид қилишингиз мумкин.
Бу нарх эвазига металл корпус ва аккумулятори узоққа, аниқроғи 2-3 кунга етадиган бошқа девайс топиш қийин. Рейтингда кейинги ўрин Xiaomi Redmi Note 4X фаблетига насиб қилган. Юқоридаги моделга қараганда нисбатан кучли процессорга эга бу модел 1 243 000 сўмдан бошлаб сотилмоқда.
Учинчи ўрин Xiaomi брендига мансуб 2 та мобил алоқа воситасига насиб қилган: Redmi Note 5A ҳамда MI 5X. Redmi Note 5A модели айни кунларда 1 225 000 сўмдан, MI 5X (Xiaomi Mi A1) модели эса 1 905 000 сўмдан бошлаб сотилмоқда.
Тўртинчи ўринда Apple iPhone 8 моделига насиб қилган. Бу айфоннинг нархи жаҳон миқёсида секин-аста пасайиб бормоқда. Бироқ, юртимиз смартфон бозорида ҳозирча бу ўзгаришни сезиш қийин.
Мисол учун, «Малика»да 2017 йил 19 декабрида iPhone 8 (64 gb) 6 232 000 сўм турган бўлса, айни пайтда унинг баҳоси 6 225 000 сўмни ташкил қилмоқда.
Samsung Galaxy S8 модели эса рейтингда 5-ўринда турибди. Мазкур девайсни бугунги кунда 5 276 000 сўмдан сотиб олишингиз мумкин.
Олтинчи ўринни 2017 йилнинг "қаҳрамони" бўлган iPhone 7 банд қилган. Мазкур модел сезиларли равишда арзонлашган. Уни юртимизда бозорларида 5 276 000 сўмдан харид қилиш мумкин.
Еттинчи ўринда Huawei P10 Plus модели турибди. 5,1 дюймли, Full HD (1920 x 1080) сиғимли экрани ва самарали платформасидан ташқари, бу модел кучли камералари билан ҳам диққатга сазовор: қўш модулли -- 12 + 20 МП бош камера. f/1,8 диафрагма, 4 каррали гибрид автофокус, икки каррали «гибрид» зум, видео тасвир сиғими 2160р.гача. Олд камера: 8 МП, f/1,9. Мазкур модел 5 543 000 сўмдан сотилмоқда.
