Visa бармоқ изи сканерли тўлов карталарини чиқаради

Тараққиёт асрида янги технологиялар турмушнинг турли соҳаларига дадил кириб келмоқда. Жумладан, бармоқ изи сканери ҳозирда асосан мобил қурилмаларда фойдаланувчининг шахсини тасдиқлашга хизмат қилиб келаётган бўлса, энди унинг қўлланиш доираси янада кенгаймоқда. Visa Inc. компанияси шунақа сканерга эга тўлов карталарини синовдан ўтказмоқда. Сўровнома орқали аниқланишича, мижозлар картани ишлатишда шахсни тасдиқлашнинг айни шу усулини кўпроқ маъқул кўришмоқда. Бу хусусда компаниянинг расмий сайтида хабар берилган.

ЎҚИНГ: Халқаро валюта операцияларини қўллаб-қувватловчи «GlobUzCard» тизими яратилмоқда

У қандай ишлайди?

Соҳибининг бармоқ изи картанинг ўзида сақланади, унинг дактилоскопик датчиги эса, картани POS-терминалга солганда фаоллашади. Шундан кейин карта эгаси хоҳласа одатдаги усул – ПИН-код ёки чекни имзолашдан фойдаланади, истаса – сканер «ўқиши» учун унга бармоғини қўяди.

Сўнгра чип бу бармоқ изини картада сақлангани билан таққослайди. Агарда улар ўзаро мос келса, карта яшил рангда «ёниб-ўчади». Бўлди – транзакцияни амалга оширишга рухсат этилди.

Зарурат бўлса, чип терминалнинг ўзиданоқ қувват олади – унинг учун янгиланишлар олишнинг кераги йўқ.

ЎҚИНГ: AliExpress ва бошқа онлайн дўконлардан харид учун зўр имконият!

Қачон экан?

Visa Inc. компанияси вакили Марк Нельсеннинг сўзларига кўра, бармоқ изи орқали транзакцияларга рухсат этилиши жуда тез амалга ошади. «Менинг ўзимни тизим бир сонияга ҳам етмасдан таниди», – дейди у.

Ҳозирча янги турдаги – дактилоскопик сканерга эга тўлов карталарини ҳозирча иккита кредит ташкилоти – Mountain America Credit Union ҳамда Bank of Cyprus мижозлари тестдан ўтказишмоқда. Уларнинг синовдан қандай ўтиши ва оммавий фойдаланишга жорий этилиши ҳозирча номаълум.

Айтиш керакки, Visa’нинг асосий рақобатчиси – MasterCard компанияси шунга ўхшаш тизимни ўтган йилнинг апрелидан буён текшириб кўрмоқда.

ЎҚИНГ: MasterCard ўз тармоғига сунъий интеллектни татбиқ этади