Vivo дунёдаги энг инновацион смартфоннинг янгиланган версиясини тайёрламоқда
Жорий йилнинг февралида Vivo компанияси ўзининг Apex русумли смартфонини тақдим этган эди. MWC 2018 кўргазмасида айни шу модел кўплаб ташриф буюрувчиларнинг эътиборини тортганди.
Гарчи Apex модели ҳали бозорга чиқарилмаган ва унинг устида ишланмалар давом этаётган бўлса-да, Vivo бу смартфоннинг янгиланган иккинчи талқинини тайёрламоқда. Slashleaks ресурси аллақачон унинг инсайдерлардан олинган суратини эълон қилган.
Оригинал Apex моделидаги каби, унинг ҳам селфи-камераси корпуснинг юқори қирраси ичкарисидан сурилиб чиқади. Экрани эса ромсиз дизайнга эга, яъни корпус олд панелининг 90 фоиздан ошиқроқ қисмини дисплей эгаллаган. Корпуснинг бурчаклари эса илк моделдагидан кўра кўпроқ думалоқланган. Афтидан, қурилманинг техник таъминоти ҳам янада кучайтирилган бўлса керак.
Vivo ушбу смартфонини қачон расман намойиш этиши ҳозирча номаълум. Шунингдек, бу модел бозорга чиқариладими ёки Apex каби прототип даражасида қолиб кетадими – буниси ҳам аниқ эмас. Бироқ «Осмон ости салтанати»нинг бошқа бир вакили «мутлақо ромсиз», шу билан бирга рекорд хотирали смартфонини тез орада расман тақдим этишини биламиз.
ЎҚИНГ: 1 терабайт нима бўпти!? Lenovo Z5 – нақ 4 терабайт хотирали илк смартфон!