Vivo тағин олдинда: олд камераси юқоридан чиқувчи, сканер ва динамиги ромсиз экранга жойланган илк смартфон! (+видео ва фотолар)

  •   DiMaX
  •  2295
  •  26.02.2018 17:15

Vivo тағин олдинда: олд камераси юқоридан чиқувчи, сканер ва динамиги ромсиз экранга жойланган илк смартфон! (+видео ва фотолар)

Кейинги пайтларда саноқли техногигантлар қатори, айрим хитойлик смартфонсозлар ҳам ажойиб технологияларга эга қурилмаларни тақдим этишаётир. Vivo компанияси эса, ҳатто айрим технологиялар бўйича етакчиларни ҳам доғда қолдириб келмоқда.

ЎҚИНГ: Apple ва Samsung уддалай олмаган технологияни Vivo амалга оширди

Хитойлик ушбу компания MWC 2018 тадбирида янги – APEX смартфонининг прототипини намойиш этди. Мазкур гаджет корпус олд панелининг 98 фоизини қоплаб олган ромсиз OLED-дисплей билан жиҳозланган.

Смартфон ромсиз дизайнда ишланган: экраннинг юқори ва ён томонларида атиги 1.8 миллиметрлик, пастида эса – 4.3 миллиметрлик энсиз ҳошиялар бор, холос. Диагонали 6 дюймни ташкил этувчи экранининг тасвир аниқлиги эса 2160х1080 пикселни ташкил этади, трендга мос тарзда унинг томонлари ҳам ўзаро 18:9 нисбатида.

ЎҚИНГ: Vivo сирли смартфон тайёрламоқда: олд панели фақат дисплей, селфи-камера умуман йўқ!

Экрани ромсизлиги туфайли, Vivo муҳандислари APEX’нинг олд камерасини жойлашда мутлақо ўзгача ечим топишган. Яъни, девайснинг селфи-камераси корпуснинг тепаси қирраси ичкарисидан сурилиб чиқади. 8 мегапикселли датчикка эга бўлган мазкур камера 0.8 сониядаёқ суратга олишга тайёр бўлади.

APEX’нинг ўзига хосликларидан яна бири – дактилоскопик сканер экраннинг ўзига жойланганлигида. Тўғри, бундай технологияни биз CES 2018 тадбирида тақдимоти бўлиб ўтган Vivo X20 Plus UD моделида ҳам кўрганмиз.

ЎҚИНГ: Виртуал сканерга эга илк смартфон расман тақдим қилинди

Лекин APEX гаджетида у анча яхшиланган: бармоқ изи датчиги одатдагидек битта нуқтада эмас, балки дисплей пастки қисмидаги катта ҳудудда жойлашган. Фойдаланувчи шу ҳудуднинг исталган жойига – ўзига қулай нуқтага бармоғини қўйиб, «ўқитиб» олиши мумкин.

Экраннинг тепаси ромсиз бўлгач, у ерда сўзлашув динамигига ҳам жой қолмаган. Шунинг учун ҳам Vivo компанияси бу смартфонида Screen SoundCasting технологиясини жорий этган. Мазкур технология бевосита дисплейнинг тепа қисмини динамикка айлантиради. Шунга ўхшаш технология Sony’нинг флагман телевизорларида ҳам мавжуд.

APEX’да яқинлашув ҳамда ёритилиш датчикларининг жойлашуви ҳақида ҳозирча маълумот берилмаган. Дарвоқе, смартфоннинг асосий камераси, худди iPhone X’даги каби жойлашган қўшалоқ модулга эга.

MWC 2018 анжуманидан етиб келган гап-сўзларга қараганда, бу гаджет 2.8 ГГц такт частотасида ишловчи саккиз ядроли Qualcomm Snapdragon 845 процессори билан жиҳозланган. Унинг илғор конфигурациядаги моделида 10 ГБ тезкор ва 512 ГБ ички хотира мавжуд.

The Verge нашри мазкур қурилманинг илк прототипларидан бирини олиб, видеотавсифини тайёрлашган. Келинг, шуни бирга томоша қиламиз:

APEX’нинг якунланган версияси қачон тўлақонли тақдим этилиши ҳақида эса хабар берилмаган. Бу борадаги янгиликлардан биринчилар қаторида бохабар бўлиб бориш учун биздан узоқлашманг.

ЎҚИНГ: Vivo яна етакчи смартфонсозларни доғда қолдирди!

Сайтимизнинг энг чиройли расмларини Инстаграмдаги саҳифамизда томоша қилинг!