Хакерлар тарихдаги энг йирик ўғирликни содир этишди

  •   DiMaX
  •  4308
  •  29.01.2018 18:07

Хакерлар тарихдаги энг йирик ўғирликни содир этишди

Турли банкларнинг электрон ҳимоя тизимини бузиб кириб, пулларни ёки маълумотларни ўмарган хакерлар ҳақида эшитиб турамиз. 2018 йил 26 январда эса шундай «ёвуз даҳо»лар бу борада ўзига хос рекорд қўйишди, деб ёзади Reuters нашри.

ЎҚИНГ: «Кўринмас» хакерлар гуруҳи банкларга ҳужум қилди

Хулласи калом, бу ўғирлик Япониядаги криптовалюта савдоси биржасида амалга оширилган. Бу 2009 йилда криптовалюта пайдо бўлганидан бери – инсоният тарихидаги энг йирик ўғирлик ҳисобланади.

Хакерлар энг оммабоп криптовалюта савдо биржаларидан бири – Coincheck ҳимоясини бузиб кира олишди ва фойдаланувчиларнинг барча пулларини ўмариб кетишди. Маълумотларга кўра, ўғирланган ушбу криптовалютанинг умумий миқдори 534 миллион АҚШ доллари эквивалентига тенгдир.

Coincheck ходимлари бу ўғирликдан хабар топишлари биланоқ маблағ ўтказмаларини тўхтатишга қарор қилишган. Шунингдек, криптовалютада ва япон иенасидаги барча маблағларнинг чиқарилишини вақтинчалик тўхтатиб туришлари эълон қилинди. Кейинроқ эса мутахассислар биткоиндан ташқари деярли барча криптовалюталардаги савдони тўхтатиб қўйишди. Шунингдек, депозитлар ва кредит карталари билан боғлиқ барча операциялар ҳам блокланди.

ЎҚИНГ: Стив Возняк барча биткоинларини нега сотганини айтди

Coincheck вакиллари хакерларнинг мазкур ҳужумидан жабр кўрган барча мижозларининг зарарини ўз ёнларидан қоплаб беришга тайёр эканликларини аллақачон расман эълон қилишган.

Шу ўринда эслатиб ўтишни лозим топдик: хакер умуман жиноятчи бўлмаслиги, бировга ёрдам бериш учун хакинг ҳаракатларини амалга ошириши ҳам мумкин. Ёмон ниятдаги – ноқонуний хакинг билан шуғулланувчиларни шартли равишда «қора хакерлар» дея номлайдиган бўлсак, бировга зиён етказмайдиган «оқ хакерлик» ҳам мавжуд.

ЎҚИНГ: «Оқ хакерлик»ни ўрганиш учун 6 та энг яхши ресурс