Xiaomi 100 долларлик Redmi Note 5A фаблетини тақдим қилди
Xiaomi компанияси бир неча дақиқа илгари навбатдаги ҳамёнбоп смартфони бўлмиш Redmi 5A гаджетини ўз юртида тақдим қилди. Redmi Note 5A гаджети 2017 йилда энг кўп сотилган Redmi 4A мобил алоқа воситасининг "меросхўри" бўлиб, кенг оммалашган "Redmi 4" смартфонлар оиласининг бир оз арзон вакилидир. Компания Redmi Note 5A'ни 2 талқинда намойиш қилди.
Redmi 4A'дан фарқли равишда, Redmi Note 5A корпуси тўлиқ металлдан ишланган ҳамда олд панел Corning Gorilla Glass ҳимоя шишаси билан қопланган. Redmi Note 5A'нинг юқори талқинидагина бармоқ излари сканери жорий қилинган.
Redmi Note 5A'нинг ҳар иккала талқини 5.5 дюймли HD (720p) экранга эга бўлган ҳамда улар Android Nougat'нинг ўзлаштирилган MIUI 9 прошивкасида ишлайди. Иккала талқинда ҳам 128 гигабайтгача хотира флешкасини қўллаб-қувватлайдиган алоҳида micro-SD, шунингдек қўшимча яна 2 та сим-карта қўйиш мумкин бўлган алоҳида бўлмачалар мавжуд.
Арзонроқ талқиндаги Redmi Note 5A смартфони Qualcomm 4 ядроли, 1,4 ГГц частота тезлигида ишлайдиган Snapdragon 425 процессорида ишлайди. Redmi 4A каби, бу талқинда 2 гигабайтли тезкор ва 16 гигабайтли доимий хотира татбиқ қилинган. Redmi Note 5A'нинг юқори талқини эса Qualcomm Snapdragon 435 процессори, 3/4 ГБ тезкор ва 32/64 ГБ доимий хотирага эга бўлган.
Ҳар иккала талқин ҳам 13 мегапикселли бош камерага эга бўлган. Бироқ, арзон талқинда 5 мегапикселли, қиммат талқинда 16 мегапикселли сенсорлардан фойдаланилган. Шунингдек, 16 мегапикселли селфи-камерали Redmi Note 5A LED-фоточақноғига ҳам эга бўлган.
Redmi Note 5A эртадан Хитойда сотувга чиқади. Унинг арзон талқини 104, қиммат талқинлари 130 ва 180 АҚШ долларидан сотувга чиқарилади.
Xiaomi Redmi 4A айни пайтда Ўзбекистон смартфон бозорида 110$ (16 Гб) ва 120$ (32 Гб) доллардан сотилмоқда. Redmi 4A 5 дюймли HD аниқлигидаги IPS экран, 13 МПли (f/2.2) асосий ва 5 Мпли олд камера, тўрт ядроли Snapdragon 425 процессори ва 2 ГБ тезкор хотира билан жиҳозланган. Доимий хотирасининг сиғими 16 ГБ, бироқ уни microSD ёрдамида 128 ГБгача кенгайтириш мумкин. Батареянинг сиғими – 3120 мА/соат. Гарчи қурилмага бармоқ изи сканери ўрнатилмаган бўлса-да, бироқ у ИК-порт ва 4G модуль билан таъминланган.
