Xiaomi Mi6’нинг “меросхўри” GFXBench’да синовдан ўтди

Xiaomi Mi6’нинг “меросхўри” GFXBench’да синовдан ўтди

2017 йилда жаҳоннинг энг илғор процессори бўлган Snapdragon 835’да ишлайдиган Xiaomi Mi6 смартфони апрел ойида тақдим қилингач, смартфоннинг ҳар бир партияси бир неча дақиқалар ичида сотилиб кетяпти. Ўз навбатида, жаҳоннинг бошқа брендлари ҳам флагманларида ушбу илғор процессорни ўрнатаётганликлари боис, Qualcomm компанияси бу чипдан етарлича етказиб бера олмаяпти.

Xiaomi компанияси процессор етишмовчилиги боис Mi6’нинг арзон талқинини ишлаб чиқаришга қарор қилган кўринади. Қолаверса, компания Mi4’дан сўнг Mi4C’ни ёки Mi5’дан кейин Mi5C каби флагманларнинг ихчамроқ вариантларини ҳам ишлаб чиқаришни анъанага айлантирган.

GFXBenh бенчмаркида Xiaomi’нинг ишчи номи “Jason” бўлган янги смартфон ҳақида маълумотлар аниқланган. Унга кўра, янги смартфон дисплейи ва бошқа баъзи бир ўлчамлари Xiaomi Mi6 флагмани билан бир хил.

Кўпчилик экспертларнинг фикрича, бу — Mi6’нинг арзонлаштирилган Xiaomi Mi6c талқини. Бу талқин флагмандан бир оз паст даражали бўлган Snapdragon 660 процессори ҳамда Adreno 512 видеокартаси билан таъминланган.

Бенчмарк натижаларига кўра, 8 ядроли ва 2,2 ГГц частота тезлигига эга Snapdragon 660 процессори платформасида ишлайдиган Xiaomi Mi6c смартфони 5,15 дюймли Full HD (1920х1080 gbrctkkb) экран, 6 Гб тезкор ва 64 Гб доимий хотира, 5 мегапикселли олд ва 4К сиғимли тасвир ёзадиган 12 мегапикселли бош камера билан таъминланади. Смартфон Android 7.1.1 операцион тизими бошқарувида ишлайди.

Xiaomi Mi6c’нинг Mi6’дан камида $70 доллар арзонга баҳоланиши кутилмоқда. Аниқроғи, баъзи инсайдерларнинг ёзишларича, Xiaomi Mi6c $289 доллардан сотувга чиқарилади. Эслатиб ўтамиз, смартфоннинг энг арзон, яъни 6 ГБ тезкор ҳамда 64 ГБ доимий хотира талқини $363 доллардан сотувга чиқарилмоқда.

Terabayt.uz сайтининг видеолари: Youtube'даги каналимизда!