Xiaomi’нинг 125 долларлик янги «ақлли» гаджети – шунчаки ҳайратомуз!

Одатда бармоқ изи сканери, кўз ёйи сканери каби инновацион датчиклар мобил қурилмалар ва хавфсизлик мосламаларига ўрнатилади. Аммо хитойлик корпорация уларни ўзининг турли бошқа девайсларига ҳам татбиқ эта бошлаган.

ЎҚИНГ: Xiaomi’нинг 20 долларлик янги гаджети барчага асқотади

Жумладан, шу кунларда Xiaomi краудфандинг платформасида янги вариантдаги «ақлли» чемодан эълон қилинган. «90 Points Smart Suitcase» деб аталувчи бу жиҳоз қулфи эгасининг бармоқ изини сканерлаш орқали очилади.

Айтиш керакки, бундай «ақлли» функциялар шу пайтгача мазкур бренднинг қимматбаҳо – металл корпусли чемоданларидагина қўлланиб келаётган эди. 90 Points Smart Suitcase моделида эса мустаҳкам уч қаватли поликарбонат – Makrolon ишлатилган ва унинг фақат ромигина алюминий қотишмасидан қилинган. чемоданнинг ғилдираклари 360 даражада айлана олади, махсус конструкция унинг умуман шовқинсиз ҳаракатланишини таъминлайди. Анодирланган алюминийдан ишланган созланувчи телескопик тутқичи эса тўрт хил ҳолатни қўллаб-қувватлайди.

ЎҚИНГ: Электрочемодан: энди сиз чемоданни эмас, чемодан сизни кўтаради (Видео)

90 Points Smart Suitcase чемоданининг TSA-қулфида фақатгина бармоқ изини сканерлаш майдончаси мавжуд. Роликлар ёрдамида терилувчи анъанавий рақамли код варианти бу моделда қўлланмаган. Шуниси ғалатироқ кўриняпти – бордию дактилоскопик датчик бирор сабаб билан ишламай қолса...

Айтиш керакки, бу чемоданда смартфондаги иловалар билан синхронлашиш функцияси йўқ, барча созламалар унинг ўзида амалга оширилади. Унинг қувватланиши режими учун ҳам икки хил ечим таклиф этилади: ё ҳар ярим йилда алмаштириш талаб этилувчи иккита батарея, ёки ғилдираклари орасидаги ҳимояли портатив аккумулятор.

ЎҚИНГ: AliExpress: Xiaomi'нинг сиз эшитмаган 8 маҳсулоти

Янги туркумдаги чемодан ҳозирча 20 дюймлик ягона моделда чиқарилмоқда – унинг сиғими 35 литрни ташкил этади. Инновацион чемоданни уч хил – жилокор яшил ва сариқ, шунингдек, жилосиз қора рангларда тиқдим этишаётир.

Нарх масаласига келсак, краудфандингда 90 Points Smart Suitcase чемоданига тахминан 125 АҚШ долларидан буюртма бериш мумкин. Бу эса Xiaomi’нинг металл корпусли, Bluetooth бошқарувли чемоданидан икки бараварга арзон, деганидир.

Умуман олганда, «хитойча Apple» шу каби кўплаб турли гаджетларни ишлаб чиқариши билан бутун дунёда танилиб бораётир. Юртимизда ҳам унинг кўплаб смартфонларига ва бошқа девайсларига расман буюртма бериш имкони мавжуд.

ЎҚИНГ: Тошкентда Xiaomi смартфонлари ва бошқа гаджетлари нархлари (2018 йил 12 май)