Xiaomi'нинг дастлабки смартфони Android 8.0 Oreo'га эга бўлди

2017 йилнинг сўнгги кунларига қадар Xiaomi компаниясининг барча смартфонлари Android 7.1 Nougat'нинг фирма томонидан ўзлаштирилган MIUI 9 операцион тизимига эга бўлди. Бунгача эса Google томонидан янада илғор бўлган Android 8.0 Oreo операцион тизими барча смартфон ишлаб чиқарувчилари учун очиқ деб эълон қилинган эди. Android 8.0 Oreo тизимдаги мақбуллаштиришлар натижасида бу тизим бошқарувида смартфоннинг ишлаш тезкорлиги Android 7.1 Nougat'дагига қараганда 10-25% га ошади.

Ишлаб чиқарувчиларнинг сўзларига кўра, платформа аввалги тизимлардан 2 баробар тез ишлайди ва юкланади. Унинг хавфсизлиги учун алоҳида Google Play Protect функцияси ишлаб чиқилган.

Кеча Xiaomi компанияси ўзининг дастлабки смартфонини Android 8.0 Oreo'га асосланган MIUI 9 операцион тизимига янгилади. Энди бренднинг энг яхши ва қимматбаҳо смартфони деб ҳисобланаётган Mi MIX 2 флагмани Google ишлаб чиққан энг яхши мобил функцияларга эга прошивканинг халқаро талқинини янгилаб олишлари мумкин.

Android 8.0 Oreo операцион тизимининг илк талқинини Xiaomi Mi MIX 2 смартфонида фойдаланиб кўриш истагида бўлганлар Mi форумида ариза беришлари, мобил қурилмалари ҳақидаги маълумотномани инглиз тилида тўлдиришлари керак бўлади. Орадан 48 соат ўтиб улар Android 8.0 Oreo тизимидан фойдаланиш имконига эга бўладилар.