Xiaomi раҳбари дунёнинг энг яхши смартфонини айтди
Жаҳоннинг йирик IT-корпорацияларидан бири бўлган Xiaomi раҳбари ҳам оддий смартфон фойдаланувчиси сифатида ўзига маъқул келган жаҳондаги энг яхши смартфон моделини эълон қилди.
14 март куни "хитойлик Стив Жобс" номи билан танилган Лэй Цзюн оммавий ахборот воситалари вакилларига интервью берди. Xiaomi раҳбари суҳбат чоғида ўзига энг ёққан смартфон ҳақида фикрларини баён қилди. Унинг жавоби журналистларни ҳайратга солди. Боиси, бундай йирик смартфон ишлаб чиқарувчи компания раҳбарлари одатда рақибларини ҳеч қачон тан олишмаган.
Xiaomi етакчиси бўлган Лэй Цзюн эса интервью мобайнида оддийгина табассум билан бош рақибини мақтаб қўйди.
"Агар мен бошқараётган компания яхши ва арзон смартфонларни ишлаб чиқармаганида, iPhone бренди ва унинг энг сўнгги ишлаб чиқарган смартфони мен учун жаҳондаги энг яхши смартфон бўлар эди".
Унинг сўзларига кўра, айнан Apple смартфонлари унинг наздида жаҳондаги энг яхши мобил алоқа қурилмалари. Лэй Цзюнга кўра аппарат таъминот, яъни процессор платформаси ҳамда дастурий таъминот ўртасида маҳорат билан яратилган мувофиқлик сабаб айфон смартфонлари саноатнинг энг кучли вакиллари бўлиб қолаверади.
Айни пайтда iPhone X модели Apple ишлаб чиқарган энг кучли смартфон модели ҳисобланади.
Шу билан бирга, Лэй Цзюнга кўра, ҳозирги вақтда Xiaomi ҳам, ва унинг рақиблари бўлган Oppo, Huawei ҳатто Samsung ҳам ўз фойдаланувчиларига смартфондан етарлича қулай фойдаланиш имкониятини бера олишмаяпти. Айтиш керакки, Xiaomi аввалига Apple каби операцион тизим яратиш билан шуғулланган. Хусусан, ҳозирги MIUI тизимини яратишда компания iOS'дан илҳом олгани кўп айтилади.
Лэй Цзюн журналистларга Xiaomi компанияси харидорлардан ҳақиқатни яширишга ҳақли эмаслигини ва ҳар ким Apple энг кучли смартфон ишлаб чиқарувчи эканини билиши кераклигини айтди. Шу боис ҳам, iPhone жаҳоннинг энг смартфони эканини айтишдан чўчимаслик керак.
Шунингдек, унинг қайд этишича, ҳаттоки Хитойнинг Xiaomi ва Huawei ёки бошқа компанияларининг катта маош оладиган мансабдорлари ҳам iPhone
тутадилар ва йирик тадбир ҳамда жамоат тадбирларида iPhone қурилмаларидан фойдаланишларини яширишга уринмайдилар.
Хитойлик IT-корпорация бош директори Лэй Цзюн интервью якунида Xiaomi компанияси унинг бошчилигида яқин йиллар ичида Apple каби, жумладан iPhone X каби энг яхши телефонлар ишлаб чиқаришга эришишини маълум қилди.
Қойил қолиш керак, рақибини тан олиш, бу - кучлилик белгиси.
