Xiaomi смартфон бозорида "портлаш" қилмоқда
Xiaomi компаниясининг бозордаги ўрни ҳақида ҳар гал хабар ёзганимизда кўпчилик унинг кун келиб етакчилар қаторидан ўрин эгаллашига шубҳа билан қарар эди. Мана, ниҳоят, "хитойлик Олма" жаҳоннинг 5 нафар энг пешқадам смартфонсозлари қаторидан ўрин эгаллади. Аниқроғи, 2017 йилнинг сўнгги чорагида маълум қилинган хабарларга кўра, Xiaomi брендига мансуб 28 миллион дона "ақлли телефон" сотилган ва аввалги йилнинг шу даврига нисбатан ўсиш 96,9% ни ташкил қилмоқда.
Бу тўғрида IDC компанияси таҳлилчилари маълум қилишган.
Сўнгги чоракда смартфон ишлаб чиқаришда Apple яққол етакчилик қилмоқда. Компания ҳисоб-китобларига кўра, америкалик бренд 77,3 миллион дона смартфон сотган. Samsung эса 74,1 миллион дона мобил телефонларни тарқатган. Унинг жаҳон смартфон бозорида бу чоракдаги улуши 18,4% ни ташкил қилади.
Huawei 10,2% улуш, яъни 41 миллион дона смартфон билан жаҳоннинг учинчи рақамли смартфонсози бўлиб турибди. Ундан сўнг Хитойда машҳур Oppo турибди. Тўртинчи чоракда бу бренд 27,4 миллион дона смартфон сотган. Унинг бозордаги улуши 6,8%.
Умуман олганда, 2016 йил билан таққослаганда, 2017 йилнинг IV чорагида мобил қурилмалар бозорида 6,3% пасайиш кузатилган. Бу чоракда дунё электроника бозорига 403,5 млн. дона смартфон етказиб берилган. 2016 йилда бу кўрсаткич 430,7 млн. донани ташкил қилган эди.
Экспертларнинг фикрича, смартфонларнинг қимматлашиб бораётгани бозорга салбий таъсир кўрсатмоқда.
