Xiaomi смартфони ишлатасизми? Янгиламай туринг, жиддий гап бор!

  •   DiMaX
  •  8868
  •  20.08.2018 10:50

Xiaomi смартфони ишлатасизми? Янгиламай туринг, жиддий гап бор!

Бугунги кунда аксарият юртдошларимиз анча ишончли бўлиб қолган Xiaomi компаниясининг смартфонларини харид қилишмоқда. Бунга уларнинг ҳамёнбоплиги, интерфейсининг қулайлиги ҳамда прошивкасининг мунтазам янгиланиб бориши ҳам сабабчи.

ЎҚИНГ: Xiaomi смартфонлари бунчалик оммабоплигининг 5 сабаби

Ушбу корпорация яқинда MIUI 10 талқинидаги ўз график интерфейсини тақдим этди ва бирин-кетин кўплаб моделлардаги смартфонларга шу асосдаги янги прошивкаларни тарқатмоқда. Ушбу прошивка «тоза» Android’дан ва Samsung прошивкаларидан ҳам тезкорроқ экани аниқланган.

Аммо битта жиддий масалани дастурчилар куни кечагина маълум қилишди: MIUI 10 базасидаги прошивка ўрнатилган аксарият Xiaomi смартфонларида қатъий чеклов бор экан. Бу чеклов – «anti-rollback» деб аталувчи функция бўлиб, унга кўра, MIUI 10’гача янгиланган смартфонни прошивканинг аввалги талқинига, ҳатто бошланғич созламаларига ҳам қайтариб бўлмас экан!

ЎҚИНГ: Xiaomi смартфонларидан яна 11 моделига MIUI 10 прошивкаси чиқди

Дастурчиларнинг сўзларига кўра, Xiaomi ўз фойдаланувчиларининг смартфонларидаги файллари хавфсизлигини таъминлаш учун бу функцияни атайлаб жорий этган. Яъни, эски талқинлардаги Android операцион тизимидаги «тирқиш» орқали смартфон блокировкасини очиб киришни уддалай оладиган махсус дастурлар мавжуд. Агарда Xiaomi телефонини қандайдир йўллар билан эгаллаб олган ғараз ниятли кимсалар унинг прошивкасини аввалги версиясига қайтара олсалар, шу дастурларни ишлатиб, ундаги файлларга кира олишлари турган гап. Шу боис ҳам MIUI 10’га anti-rollback функцияси жорий этилган ва унинг ҳимояси анча мустаҳкам.

Айни дамгача аниқланишича, компаниянинг Redmi 6 Pro, Mi 6X ҳамда Mi 8 русумли смартфонлари учун чиқарилган MIUI 10 базасидаги прошивкаларда anti-rollback функцияси мавжуд. Xiaomi яқин орада бошқа кўплаб моделлардаги мобил қурилмаларига уни жорий этмоқчи. Шундай экан, смартфонингиз прошивкасини янгилашдан олдин, сўнг уни орқага қайтариш имкони бўлмаслигини ҳам назарда тутинг.

Эслатиб ўтамиз, Google ҳам ўзининг сўнгги авлод операцион тизимида худди шундай функцияни мажбурий тарзда жорий этган.

ЎҚИНГ: Android 9 Pie’га ўтмоқчимисиз? Ёдда тутинг: орқага йўл йўқ!

Хабарларни тез ва осон ўқиш учун Андроид иловамизни сақлаб олинг.