Xiaomi смартфонларида MIUI 9’нинг ажойиб функциясини фаоллаштирамиз (+видео)

«Хитойча Apple» ўзи ваъда қилган барча смартфонларига операцион тизим қобиғининг MIUI 9 Global Stable талқинини жорий этди. Энди ўттиздан ортиқ моделлардаги Xiaomi смартфонлари янада тезкорроқ, эренгия тежовчи ва илғор прошивка базасида ишламоқда.

ЎҚИНГ: Xiaomi смартфонлари учун MIUI 9 расман фойдаланишга топширилди

Гарчи MIUI 9 прошивкаси Xiaomi’нинг барча смартфонлари учун ягона бўлса-да, ҳар бир модел учун у турли Android талқинларига асосланган. Кейинги икки йил ичида ишлаб чиқарилган барча моделлардаги смартфон эгаларининг эса роса омади келган – улардаги MIUI 9 прошивкаси Android 7.0 Nougat тизим талқини базасида яратилган. Омаднинг келгани шундаки, ушбу талқинда ажойиб бир янги функция – экранни иккитага ажратиш имкони (Split Screen режими) мавжуд.

ЎҚИНГ: Xiaomi смартфонлари бирорта iPhone’да йўқ жиҳатга эга бўлади

Мазкур янги функция Xiaomi смартфонларида бир вақтнинг ўзида иккита илова билан ишлаш имконини тақдим этади. Табиийки, Split Screen режимида ишлаш катта экранли смартфонлардагина қулай. Диагоналига 5 дюймлик ёки ундан кичик дисплейга эга қурилмаларда эса, бу режимда иловаларда ҳамма нарса майда бўлиб кетади ва бу ноқулайлик туғдиради. Компаниянинг таъкидлашича, иккита илова билан бараварига ишлаш Mi Max 2 ҳамда Mi MIX 2 моделларида қулай, зеро, бу иккала девайс ҳам экранининг улканлиги билан ажралиб туради.

ЎҚИНГ: "Лопатафон" – Xiaomi Mi Max 2 халқаро бозорда сотилмоқда

У ёки бу иловадан Split Screen режимида фойдалана бошлаш учун, аввало, керакли иловаларни очиб оласиз. Сўнг эса кўп вазифалилик менюсини очсангиз, ишга туширилган иловалардан ташқари, экраннинг юқори қисмида Split Screen белгиси ва «Разделение экрана» ёзуви кўринади. Унинг устига битта босиб фаоллаштирасиз ва ишга туширилган иловалардан бирини ушлаб, унинг устига олиб бориб ташлайсиз. Бу илова экраннинг ярмини – юқори қисмини эгаллаб очилади. Энди эса экраннинг пастки қисмида исталган бир иловани очиб ишлатаверасиз.

Қуйида шу жараённи видеода томоша қилишингиз мумкин:

Яна бир қулайлиги – у ёки бу илованинг экранда эгаллаган жойи ҳажмини созлаш мумкин. Бунинг учун экран қисмларини ўзаро ажратиб турган қора рангли чегара чизиғининг ўртасига босиб, уни юқорига ёки пастга суриш лозим.

Айтиш керакки, Android 7.0 Nougat базасидаги MIUI 9 прошивкаси ўрнатилган Xiaomi смартфонларидаги ушбу функцияда экранни иккига ажратувчи Split Screen режимига мослаб оптималлаштирилган иловаларни ишлатиш мумкин.

ЎҚИНГ: MIUI 9’гача расман янгиланадиган Xiaomi смартфонлари рўйхати