Xiaomi Valentino – сирли Snapdragon процессорига эга яна бир смартфон бенчмаркда «қўлга тушди»
Шу кунларда, аниқроғи – 10 май куни Xiaomi корпорациясининг Redmi S2 русумли арзон смартфони тақдим этилиши кутилмоқда. Ундан салгина кейинроқ – 23 май куни эса бу смартфонсоз ўзининг Mi 7 флагманини ҳам намойиш қилмоқчи.
ЎҚИНГ: Металл корпусли, лекин арзон Xiaomi Redmi S2: техник хусусиятлари, расмий суратлари ва нархи
Булардан ташқари, ушбу корпорация яна битта – кодли номи Valentino бўлган смартфон тайёрлаётган экан. У ҳақдаги илк маълумотлар – қурилманинг техник хусусиятлари машҳур Geekbench сервисининг маълумотлар базасида аниқланган.
Xiaomi Valentino шу пайтгача бирор жойда учрамаган процессор – Snapdragon 638 чипи базасида ишлайди. Афтидан, у Redmi Note 5 смартфонидаги Snapdragon 636 процессорининг яхшиланган версияси бўлса керак. Snapdragon 638 чипи 1,44 ГГц такт частотасида ишловчи саккизта ядрони ўзида жамлаган.
Бенчмарк натижаларига қараганда, Snapdragon 638 процессори самарадорлик даражасига кўра Snapdragon 820 билан бир қаторда туради. Ушбу чип 6 гигабайтлик тезкор хотира билан ҳамкорликда Xiaomi Valentino самарадорлигини таъминлаб беради.
Янги Xiaomi смартфони Android 8.1 Oreo операцион тизим талқини бошқаруви остида ишлайди. Унинг бозорга қандай ном билан тақдим этилиши ва дизайни тўғрисида бирорта маълумот чиқмаган. Лекин «хитойлик Apple»нинг кўплаб моделлардаги смартфонлари ва бошқа девайслари юртимизда ҳам расмий кафолат билан сотилмоқда.
