Xiaomi’нинг MIUI 9 бета-тестерлари жамоасига қўшиласизми?
Xiaomi смартфонлари компаниянинг MIUI қобиғи остидаги Android операцион тизимида ишлашидан хабарингиз бор. Бу қобиқнинг янги версияларини кенг оммага тақдим этишдан аввал амалда синаб кўрувчи бета-тестерлар ёрдамига зарурат сезилади.
Бета-тестер бўлиш – смартфон ишлаб чиқарувчиларга кўнгилли тарзда ёрдамлашиш ҳамда уларнинг ҳали оммавий тарзда тақдим этилмаган дастурий таъминотлари билан биринчилар қаторида танишиш демакдир. Xiaomi компанияси ҳам ўз смартфонлари фойдаланувчиларига бета-тестер тарзида MIUI 9 операцион тизим қобиғини синаб кўриш имкониятини тақдим этади.
Xiaomi айни дамда Хитой бозори учун чиқарилган прошивканинг хусусиятларини ўрганиш учун бета-тестерлар изламоқда. Яқин орада эса MIUI 9’нинг глобал прошивкаларини синаб кўриш ишлари ҳам бошланади.
Хўш, бета-тестларда иштирок этиш учун нималар керак бўлади?
1. Аввало, Xiaomi компаниясининг тегишли моделларидан бирига оид смартфонингиз бўлиши керак. Булар қуйидагилардир: Mi 6, Mi 5s Plus, Mi 5s, Mi 5, Mi 4S, Mi 4c, Mi 4, Mi 3, Mi 2/2S, Mi MIX, Mi Max 2, Mi Note 2, Mi Note/Pro, Mi Pad 2, Mi Pad 1, Redmi Note 4X (MTK), Redmi Note 4X (Snapdragon), Redmi Note 4, Redmi Note 3 (MTK), Redmi Note 3 (Snapdragon), Redmi Note 2, Redmi Note, Redmi Pro, Redmi 4X, Redmi 4A, Redmi 4, Redmi 4 Prime, Redmi 3S/Prime, Redmi 3, Redmi 2A, Redmi 2/Prime, Redmi 1S, Redmi 1.
2. Бета-тестда қатнашиш учун, сиз кастом ROM прошивкаларини ўрнатиш бўйича кўникмаларга эга бўлишингиз лозим. Шунингдек, жараёнларда инглиз тили ҳам кераклиги боис, ундан хабардор бўлишингиз талаб этилади.
3. Жамоага қўшилиш учун Google Play дўконидан Xiaomi MIUI Forum (инглизча) иловасини мана бу ҳавола орқали ўрнатиб олишингиз зарур. Ўрнатиб олгач, ундаги Recruitment варақасида ўз шахсий маълумотларингизни киритиб, тасдиқлашингиз керак.
Агарда бета-тестинг жараёнларига сизни ҳам қабул қилишса, бу ҳақда билдиришнома келади. Бета-тестерларни танлаш муддати 1 августгача давом этади. Демак, ўзига ишонган, янгиликларга ишқибоз ёшларимиз ҳали ҳаракат қилиб кўрсалар бўлади. Олға!
