Яндекс корпоратив фойдаланувчилар учун янги мессенжер чиқаради
Россиянинг Яндекс компанияси тез кунда корпоратив фойдаланувчилар ўртасида мулоқотни йўлга қўйишга хизмат қиладиган “Коннект” номли платформани тақдим этади, деб ёзмоқда Известия нашри.
“Яндекс.Коннект” веб сайт ва персонал компьютерларга чиқарилган иловани ўзаро бирлаштиради. Тизим компания доирасида мулоқотни бўлимлар ёки мавзулар бўйича тақсимлашга кўмаклашади. Шунингдек, ёзишмалар юритиш ва ўзаро файл алмашишга имконият беради.
Бундан ташқари, мазкур платформа лойиҳаси асосида Android ва iOS дастурларига мўлжалланган “Ямб” номли мобил илова ҳам яратилади. Ушбу клиент фақатгина “Яндекс.Коннект” платформасига боғлангандагина фаолият юритиши мумкин бўлади. Албатта, платформа Яндекснинг бошқа сервислари билан фаол интеграцияланади. Уларга “Почта”, “Диск” булутли хотираси, “Календарь” ва “Контактлар”ни мисол қилиш мумкин.
Ҳозирча “Яндекс.Коннект” платформаси ва “Ямб” иловасининг тақдимот санасига аниқлик киритилмаган.
