YouTubeMP3 Converter – YouTube’даги роликларнинг овозини сақлаб олиш сервиси
YouTube’дан видео кўчириб олиш йўлларини биламиз, аммо баъзан лавҳанинг фақат овозини аудиофайл сифатида сақлаб олиш керак бўлиб қолади. Шунда YouTubeMP3 Converter сервиси сизга қўл келади: у YouTube’даги клипнинг мусиқасини (ёки бошқа исталган лавҳанинг овозини) mp3 форматида кўчириб олиш имконини беради.
Бу усул сизни анчагина машаққатлардан қутқаради: кўп вақт ва трафик сарфлаган ҳолда YouTube’дан видеони кўчириб олиш, кейин уни аудиофайлга конвертация қилиш керак бўлмайди.
YouTubeMP3 Converter сервиси мазкур муаммони ҳал этишдан ташқари, сизга керак бўлиб қоладиган яна бир қатор функцияларни ҳам тақдим этади.
Агарда сиз унга YouTube’даги плей-лист ҳаволасини кўрсатсангиз, ортиқча уринишларсиз уни яхлит архив ҳолида юклаб олиб беради. Архивдаги ҳар бир трек рақамланган ҳамда худди видеолавҳадаги каби номга эга бўлади. Бу – YouTubeMP3 Converter’нинг шу каби бошқа сервислар устидан яққол устунлигидир.
Шунингдек, сиз онлайн режимда ёзувнинг узунлигини ўзгартиришингиз ҳам мумкин. Бунинг учун фақатгина ёзувдан қайси қисми керак бўлса, ўша жойининг бошланиш ва тугалланиш вақтларини кўрсатсангиз кифоя.
Булардан ташқари, мазкур сервис юкланадиган овоз ёзуви учун ўзингизга керакли аниқ битрейтни танлаш имконини ҳам беради. Агар буни кўрсатмасангиз, у ҳолда YouTubeMP3 Converter автоматик тарзда овозни энг яхши сифатда кўчириб олиб беради.
Сервисдан фойдаланиш учун исталган видеоролик манзилидаги youtube (www.youtube.com/…) сўзини ytbmp3 (www.ytbmp3.com/…) сўзига алмаштирсангиз ҳам бўлади – унинг овоз йўлакчаси ўз-ўзидан кўчирила бошлайди.
YouTubeMP3 Converter сервисининг ягона камчилиги – файлларни кўчириб олиш тезлигининг пастлигидир. Бу тезлик атиги 500–600 Кб/с.ни ташкил этади. Аммо, хизмати бепул эканини инобатга олсак, мазкур камчиликни кечирсак ҳам бўлади, тўғрими? Масалан, 200 қўшиқдан иборат плей-листни кўчириб олиш учун сиз ярим соатдан сал ошиқроқ вақт сарфлайсиз, холос.
Мазкур сервиснинг ишлашини мана бу ҳавола орқали унинг расмий сайтига ўтиб, текшириб кўришингиз мумкин. Кўчириб олиш бир лаҳзадаёқ бошланади, сиз ҳатто конвертация якунланишини кутишингиз ҳам шартмас.
