Google аккаунтингизга кира оладиган дастурларни аниқлаш ва уларни чеклаш
Android тизимли мобил қурилмадан ёки Gmail почтасидан, умуман олганда – Google сервисларидан фойдаланаётган киши ўз аккаунтини ҳимоялашга ҳам эътибор бериши лозим. Зеро, сиз ишлатадиган ҳар хил иловалар аккаунтингиз орқали сизнинг шахсий маълумотларингизни олиши ва улардан турли мақсадларда фойдаланиши мумкин.
ЎҚИНГ: Gmail’ни бузишнинг янги усули тарқалди
Google аккаунтингизга қайси иловалар кира олишини аниқлаш ҳамда уларнинг бу рухсатини чеклаш эса қуйидаги усулда амалга оширилади.
- Аккаунтингизни бошқариш саҳифасига ўтинг, у https://myaccount.google.com манзилида жойлашган.
- Шу ердаги «Хавфсизлик ва кириш», яъни «Безопасность и вход» бўлимига ўтиб, «Аккаунтга рухсати бор иловалар» – «Приложения, у которых есть доступ к аккаунту» варақасини очинг.
- Бу ерда таклиф этилган ҳавола орқали иловаларни бошқариш саҳифасига ўтинг. Аккаунтингизга кира оладиган дастурлар рўйхати чиқади, улардан кераксизларини чеклашингиз мумкин. Бунинг учун ўша илова номидан чап томонда жойлашган ўчириш тугмачасини босиб, сўнг тасдиқлаб юборсангиз кифоя.
Бўлди, энди ортиқча қизиқувчан иловалар Google аккаунтингизга кира олмайди.
