Microsoft ишчилари қанча маош олади?

Microsoft ишчилари қанча маош олади?

Юзлаб Microsoft ишчилари ёпиқ Facebook гуруҳида ўзларининг маошлари ҳақидаги маълумотларни ҳамкасблари билан улашмоқда. Бундан дунёдаги энг катта технология компанияларидан бири ишчи-ходимларига қанча ҳақ тўлашини билиб олиш мумкин.

Ишчилар маоши уларнинг тажрибаси, қобилиятлари ва кўплаб бошқа омилларга кўра бир-биридан фарқ қилади. Бундан ташқари, аксарият ходимларга уникал бонуслар тақдим қилиниши уларнинг даромадини кескин ошириб юборади. Medium сайтидаги маълумотларга қараганда, Microsoft'да дастурчи-мухандис сифатида уч йиллик иш стажига эга 62 тоифадаги "оддий ишчи"нинг йиллик маоши 150 минг долларни ташкил қилади. Бунга қўшимча унга 20 минг доллар шартнома бонуси ҳамда 15 000 доллар миқдорида компания улуши тақдим қилинади.

Технология компаниялари ишчилари оладиган маошлар ҳақида турли манбалардан аноним маълумот йиғиб борувчи levels.fyi сайти эса Microsoft'нинг 62 тоифадаги дастурчи-мухандиси йилига умумий ҳисобда 182 158 доллар топиши, бундан 137 737 доллари маош, 26 158 доллари акция ва 18 263 доллари шартнома бонуси эканлигини кўрсатган. Бу ишчиларнинг ўзлари бир-бири билан улашган маълумотдан фарқ қилади, лекин тафовут ўта катта эмас. Эътибор беринг, ходимлар бир-бири билан улашган рўйхатда 400 та ишчининг (Microsoft'да 150 минг ходим ишлайди) номи келтирилган бўлса, levels.fyi'да 147 та ишчи берган маълумотдан ўртачаси чиқарилган. 147 нафар кишининг маълумотидан кўра 400 киши тақдим қилган маълумот орқали тўғрироқ хулосага келиш мумкин.

62 тоифадан ҳам қуйироқдаги ишчилар (умумий қилиб айтганда, бир неча йил иш тажрибасига эгалар ва/ёки мактаб битирувчилари) умумий ҳисобда 130 287 доллар маош, 16 824 доллар шартнома бонуси ва 25 902 доллар акция олади.

Medium'нинг аниқлашича, мухандисларнинг лавозими кўтарилиши билан уларга компания акция кўринишида берадиган тўловлар ҳам кескин ортади (шартнома бонуси ўзгармаса ҳам).

Умуман олганда, Microsoft ишчиларига тўлайдиган ҳақ, акция ва бонуслар IBM, Oracle ва бошқа техногигантларникига нисбатан анчайин юқори.

Яна бир жиҳатни унутмангки, кўплаб компаниялар ишчиларига пул кўринишида бўлмаган бошқа қулайликлар ҳам тақдим қилади. Булар қаторига узайтирилган таътил муддати ёки мослашувчан иш вақтини киритиш мумкин.

ЎҚИНГ: Стив Жобсдан ўнта энг машҳур афоризм

Сайт янгиликларидан доимий хабардор бўлиш учун Телеграм каналимизга қўшилинг!