Samsung ўта радикал дизайнни патентлаган экан
Смартфоннинг олд панелига илк тирқиш ўрнатилганда, бу кўпчиликка ёқмаган эди. Аксарият одамлар бундай ечим смартфоннинг симметриясига ҳалал бериши ҳамда ақлли телефонлар дизайни тараққиётига тўсиқ бўлиши ҳақида хавотирланган эди. Айтиш мумкинки, бундай хавотирлар, асосан, қўшкамерали селфи модули тириқишига доир.
Иккита камерадан ташкил топган селфи камера модули тирқиши ҳали ҳолва экан: қарийб бир йил олдин Samsung Корея интеллектуал мулк агентлигига патентлаш учун янгича смартфон дизайнини тақдим қилган экан. Ушбу патентнинг тафсилотлари ҳозиргина ошкор қилинди, рендерлари (ясама тасвирлари) эса LetsGoDigital сайтида эълон қилинди. Патент фақатгина дизайнга оид бўлгани учун, ундан истиқболдаги Samsung смартфонлари ҳақида кўп нарса билиб бўлмайди.
Патентга кўра, смартфон дисплейини максимал даражада катталаштириш учун тирқиш дисплейдан тепага ўрнатилади. Лекин бундай дизайнда чиқарилган қурилма фойдаланувчиларга қанчалик маъқул бўлишига қизиқяпмиз.
Патент тавсифи: жорий дизайн дисплейга доир. Бунда экран панели смартфоннинг олд томонини қопловчи ойна остида жойлашади. Қоплама ойнанинг юқори қисми марказида эса ён томонларидан ажралиб чиққан қисм бўлиб, шу ерда камера, карнай ва датчиклар жойлаштирилади. Бу тўртбурчак экран ишлаб чиқараётганда дисплей максимал даражада катта бўлишини таъминлайди.
Бу, албатта, дисплейни катталаштиришнинг энг яхши йўли эмас. Ваҳоланки, бир неча компания бундай модулга илгари ҳам қизиқиш билдирганининг гувоҳи бўлганмиз. Умид қиламизки, "тескари тирқишли" смартфон яқин келажакда ишлаб чиқарилмайди. Шундай бўлган тақдирда эса Samsung'дан бу ҳаракати учун асосли изоҳ кутиб қоламиз.
ЎҚИНГ: Xiaomi мисли кўрилмаган селфи камера дизайнини яратди
