Samsung тезкор ва симсиз қувватловчи чўнтак зарядлагичи устида ишламоқда
Samsung ва ниҳоят ўз флагманларига тезкор қувватлаш технологиясини жорий қила бошлади: Galaxy Note10+ 45 ватт тезликда заряд олади!
Смартфонларнинг бу каби тезлигига мос чўнтак зарядлагичи ишлаб чиқариш вақти ҳам келди ва айни дамда Samsung бу борада иш олиб бормоқда.
FCC Samsung'га тегишли ва модель рақами EB-U3300 бўлган симсиз зарядлаш имконига эга ташқи аккумуляторни сертификатлади. Бу ҳақида SafetyKorea сайтига таяниб SamMobile хабар бермоқда.
Маълум қилинишича, гаджет смартфонларни 25 ватт тезликда қувватлай олади.
Зарядлагичнинг расмларидан кўриниб турибдики, мосламада иккита USB-C порт ва симсиз қувватлаш пади бўлади. 25 ватт тезликка фақат ҳар икки томони USB-C типидаги кабель билан эришиш мумкинлиги сабаб, ташқи аккумуляторда USB-A стандарт порти мавжуд эмас.
Қувватлагичнинг симсиз қувватлаш тезлиги 15 ватт, сиғими эса 10 000 мА/соат бўлиши кутилмоқда.
Повербанк қачон тақдим қилиниши ҳозирча расман маълум қилинмаган, бироқ Galaxy S11 билан бирга февраль ойида намойиш қилиниши эҳтимоли ҳам йўқ эмас. Ваҳоланки, Galaxy Note10/Note10+, Galaxy A70 каби қурилмалар аллақачон 25 ваттда зарядлана олишини инобатга олиб яна айтиш мумкинки, чўнтак қувватлагичи Galaxy S11'дан олдинроқ омма эътиборига ҳавола қилиниши ҳам мумкин.
Батафсил маълумот учун бизни кузатишда давом этинг.
ЎҚИНГ: Speedtest синови: Samsung, Apple ва Huawei – қай бирида интернет энг тезкор?
