Xiaomi кутилган қурилмаси ҳақида кутилмаган хабар берди
Сентябрь ойида Xiaomi Mi Mix Alpha смартфонини эълон қилганда, барча янгиликларда ушбу икки томони экран билан қопланган уникал қурилма ҳақида кўп нашрлар ёзган эди.
Футурустик смартфон декабрь ойида чекланган миқдорда ва 2 800 АҚШ доллари атрофида сотувга чиқиши кутилаётган эди.
Бироқ, Abacusnews.com сайтининг берган хабарларига кўра, компания ушбу девайс сотувлари бошланишини кечиктирди ва мижозлар қачондан бошлаб бу смартфонни харид қилишлари мумкинлиги ҳозирча номаълум.
Ўтган ой қурилма қисқа муддат Xiaomi'нинг онлайн дўкони ва Tmall'да пайдо бўлган, бироқ ҳеч қандай олдиндан буюртма бериш ёки харид қилиш имконияти мавжуд эмас эди.
Mi Mix Alpha'нинг тақдимоти пайтида компания Бош ижрочи директори ўрама экранни ишлаб чиқаришдаги техник қийинчиликлар сабаб фақат чекланган миқдорда ишлаб чиқарилишини айтган эди.
Биз эса, одатдагидек, воқеалар ривожини кузатишда ва сизни янгиликлардан бохабар қилишда давом этамиз.
