Kirin 990 5G чипли қиммат букламафон – Huawei Mate Xs намойиш қилинди (+«жонли» видео)
Huawei компанияси ўтган йили қайишқоқ экранли Mate X смартфонини тақдим этган ва 15 ноябрдан сота бошлаган эди. Унинг иккинчи авлоди – Mate Xs ҳақидаги дастлабки хабарлар ҳам ўша ой бошида пайдо бўлган.
ЎҚИНГ: Huawei'га қарши навбатдаги зарба
Кутилганидек, хитойлик техногигант куни кеча бир қатор янги гаджетларининг онлайн тақдимотини ўтказди. Улар қаторида компаниянинг иккинчи букламафони – Huawei Mate Xs ҳам бор.
Huawei ушбу смартфонида ўзининг энг сўнгги ва кучли Kirin 990 5G чипсетини қўллаган. Мазкур процессор 7 нанометрлик технологик жараён асосида ишланган бўлиб, юксак самарадорликдаги иккита Cortex-A76, иккита ўртача – Cortex-A76 ҳамда тўртта кичик – Cortex-A55 ядроларини ўзида жамлаган; уларнинг ишлаш частоталари эса тегишлича 2.86 ГГц, 2.36 ГГц ва 1.95 ГГц.ни ташкил этади. Процессорга бешинчи авлод уяли алоқа стандартини қўллаб-қувватловчи Balong 5000 модеми ҳам қўшилган.
ЎҚИНГ: AnTuTu рейтинги: Интернети энг тезкор смартфонлар
Қуйидаги видеода Huawei Mate Xs смартфонини «жонли» кўришингиз мумкин:
Букламафон EMUI 10 график қобиғи остидаги Android 10 операцион тизими билан тақдим этилган, аммо унда Google сервислари мавжуд эмас.
ЎҚИНГ: Google: «Huawei қурилмаларини ўзингиз мустақил янгиламанг»
Аслини олганда, бу – бултурги Mate X моделининг илғор версияси, дейиш мумкин, аммо баъзи жиҳатлари анча яхшиланган. Аввало, букилиб-очилишлари зиёнсиз ва силлиқ бўлиши учун унда янгиланган Falcon Wing шарнири қўлланган. Қолаверса, Mate Xs экрани икки қаватлик полиамид плёнка билан қопланган (ўтган йилги букламафон дисплейида эса у бир қаватли). Ишлаб чиқарувчининг таъкидлашича, шулар эвазига бу йилги флагмани ўз «аждод»ига нисбатан 80 фоизга мустаҳкамлашган.
Флагман бошқа жиҳатлари билан Mate X’дан фарқ қилмайди: 8 дюймлик AMOLED-экрани 2480х2200 пикселлик бўлиб, корпуси ёпилганида у 6.6 ва 6.39 дюймлик иккита дисплейга айланади.
Mate Xs аккумулятори 4500 мА/соатлик, у 55 ваттлик технология асосида тезкор қувватлана олади. Huawei зиқналик қилмасдан, тегишли қувватлагични ҳам смартфон қадоғидаги жамланмага киритган.
Мазкур смартфон 8 гигабайтлик тезкор ва 512 гигабайтлик ички хотира, 40 + 16 + 8 мегапикселлик камера ҳамда суратга олинаётган саҳна чуқурлигини ўлчовчи TOF-камера билан таъминланган. Huawei ушбу маҳсулотини март ойида глобал бозорга чиқармоқчи ва унинг учун 2500 евро сўраяпти.
ЎҚИНГ: Дунё смартфон бозорида етакчи ким ўзи? (2 та рейтинг)
