Xiaomi бирйўла иккита – Mi Band 5 ҳамда Mi Band 4C фитнес-билагузукларини чиқаряпти
Билакка тақилувчи гаджетлар – смарт-соатлар ва фитнес-браслетлар бозорида ҳам Xiaomi ўз ўрнига эга. Ўтган йилнинг сўнгида у бу борада Huawei, Samsung, Fitbit ва ҳатто Apple’ни ҳам ортда қолдирган!
ЎҚИНГ: Xiaomi қуввати 30 кунга етувчи, ҳимояланган смарт-соат тақдим этди
Компания мухлислари анчадан бери кутаётган Mi Band 5 фитнес-трекери куни кеча Тайваннинг Миллий алоқа комиссияси – NCC ташкилотида сертификатланди. Аниқроғи у ерда кодли номи XMSH10HM бўлган янги қурилма рўйхатга олинган. Олдинги икки авлод – Mi Band 3 ҳамда Mi Band 4 смарт-браслетлари тегишлича XMSH07HM ва XMSH5HM кодли номига эга эканини ҳисобга олсак, NCC сайтидаги девайс айнан Mi Band 5 экани ойдинлашади.
Шу кунгача сизиб чиққан маълумотларга кўра, Mi Band 5 олдингисига нисбатан каттароқ – 1,2 дюймлик экранга ҳамда бутун дунё бўйлаб ишловчи NFC чипига эга. Нархи ҳозирча номаълум, лекин сертификациядан ўтганига қараганда, Xiaomi уни тез орада тақдим этса керак.
Бундан ташқари, Индонезиядаги операторлардан бирининг сайтида яна битта – Mi Band 4C русумли «ақлли» билагузук ҳам пайдо бўлган. Маълумотларга кўра, бу – корпорациянинг Redmi бренди апрелнинг бошида тақдим этган рангдор дисплейли Redmi Band моделининг глобал бозорга мўлжалланган версиясидир.
ЎҚИНГ: Xiaomi’нинг янги хити сотувга чиқиб, унинг иккита рақиби арзонлашди
