Galaxy Note 20'лар Samsung'нинг ҳафсаласини пир қилмоқда

Galaxy Note 20'лар Samsung'нинг ҳафсаласини пир қилмоқда

Жанубий Кореядан берилган хабарларга кўра, Samsung'нинг флагман тоифадаги Galaxy Note 20 линейкаси смартфонлари савдолари яхши эмас. Бу ҳақда GSMArena хабар бермоқда.

Инсайдерларга кўра, кореялик компания октябрь ойида 900 минг дона Galaxy Note 20/20 Ultra смартфонларини ишлаб чиқаришни режалаган эди, бироқ ушбу қурилмаларга бўлган талаб кутилганидан паст бўлгани боис режани ўзгартириб, 600 мингта Note флагманларини ишлаб чиқаришга тўғри келган.

Манбанинг маълум қилишича, ушбу кўрсаткич ҳам базавий модель Galaxy Note 20, ҳам Galaxy Note 20 Ultra'га тааллуқли. Тахминларга кўра, арзонроқ Note 20'нинг унумдорлиги кутилганидек даражада эмаслиги савдолар ҳажми камлигига сабаб бўлиши мумкин.

Samsung чораклик ҳисоботларида жорий йилнинг учинчи чорагидаги операцион фойдаси ўтган йилнинг мос даврига нисбатан 50% ўсганини маълум қилганди, аммо Note 20'лар савдоси яхши бўлмаётгани боис компания ушбу натижани тўртинчи чоракда ҳам сақлаб қола олмаслиги мумкин.

Иккинчи томондан олиб қаралса, Note 20'ларни ишлаб чиқариш ҳажмининг камайиши Жанубий Кореядаги заводларнинг Galaxy S21'ларни ишлаб чиқаришга тайёргарлик кўришига имкон яратиши мумкин. Хабарларга кўра, навбатдаги S серия флагманлар биринчи босқичда 2 миллион дона ишлаб чиқарилади.

ЎҚИНГ: Samsung тасодифан Galaxy Note 20 туркумидаги янги смартфонни «сотиб» қўйди!