2021 йилда Samsung'дан кутаётган 5 нарсамиз
2020 йил Samsung учун аралаш келди. Компания ўзининг Galaxy S20 FE, Galaxy Z Fold 2 ва Galaxy A серия смартфонлари борасида анчайин муваффақиятга эришган бўлса, Galaxy S20'лар ҳамда Galaxy Note флагманлари савдоси мақтарли даражада бўлмади.
2020 йилда Samsung 90% эътиборини премиум бозорога беришни тўхтатишга тайёр эканини кўрсатиб берди. Корейслар муваффақиятининг катта қисми арзон смартфонлар улушига тўғри келди. Бунда COVID-19 пандемияси қайсидир маънода ўрин тутган бўлиши ҳам мумкин. Нима бўлган тақдирда ҳам, компания ҳаммага ҳам 1,000+ долларлик смартфон керак эмаслигини тушуниб етди.
ЎҚИНГ: Технология олами: 2021 йилда бизни нималар кутмоқда?
2021 йилда Samsung ҳамёнбоп смартфонлар борасида эришган ютуқлари кўламини кенгайтиришга уриниши керак. Иккинчи томондан эса, компания букланувчан смартфонларга ҳам янада кўпроқ эътибор бериши керак бўлади. Аслида, янги 2021 йилда «Уч юлдуз»дан жуда кўп нарса кутмоқдамиз, лекин қуйида уларнинг энг асосий 5 тасини келтириб ўтамиз.
1. Ҳамёнбопларга кўпроқ эътибор бериш
Samsung Galaxy S20 FE смартфони йилнинг смартфон қотили ва энг оммабоп смартфонларидан бири бўлгани ҳақида ёзгандик. Тўғри, 2020 йилда компания S20 FE'дан кўра анчайин яхши смартфонлар чиқарди, лекин уларнинг нархи ва техник жиҳатлари бир-бирига S20 FE'чалик мос келмайди. S20 FE айнан нархига мос смартфон бўлгани боис жуда оммалашди.
Бундан ташқари, Samsung'нинг ҳамёнбоп линейкалари — Galaxy A, Galaxy M ва Galaxy F'лар — ҳам мақташга арзигулик бўлди. Ваҳоланки, Galaxy S ва Note оиласи вакиллари тижорий жиҳатдан муваффақият олиб келмади.
2021 йилда, Samsung ўз эътиборини кўпроқ ҳамёнбоп моделларига қаратишига умид қилиб қоламиз. Тўғри, ҳаммамизга Galaxy S'лар, стилусли Note'лар ёқади, аммо смартфон учун 10–12 миллион сўм сарфлаш ҳаммага ҳам осон эмас. Чунки бошқа компанияларнинг зўр техник жиҳатларга эга смартфонларни Galaxy S/Note'ларнинг ярим нархига сотиб олса бўлади.
2. Букламафонларнинг амалий аҳамиятини ошириш
Samsung 2021 йилда кўпгина букламафон чиқаришга ваъда берган. Уларнинг баъзилари ҳатто ҳаймёнбоп (лекин арзон эмас) бўлади. Samsung бутун дунёдаги ҳамма букламафонларни ўзи ишлаб чиқаришга қодир, лекин компания, биринчи ўринда, нега айнан букланадиган смартфон ишлатишимиз кераклигига бизни ишонтира олиши керак.
Масалан, Galaxy Z Fold 2 эгалари: «Менинг смартфоним очилиб-ёпилади!» деб мақтанишдан бошқа гапларни ҳам айта олиши керак.
Агар 2021 йилда букламафон сотиб олишимизни хоҳласа, Samsung бу учун бизга амалий бир сабабни кўрсатиши керак. Ҳам дастурий томондан, ҳам техник томондан букламафон ўзига хос ва амалий аҳамиятга эга бўлиши керак.
Компания, шунингдек, бундай смартфонлар дизайнини такомиллаштириши, чидамли ва арзон қилиши керак бўлади. Истеъмолчига бир олам ўртача сифатли букламафон эмас, балким 2–3 йил бузилмасдан ишлай оладиган кучли, юқори сифатли қурилма керак. Бундай форма факторли смартфонлар ишлаб чиқариш бўйича Samsung етакчи эканини инобатга олсак, корейслар бу борада кўп марраларга эришиши эҳтимоли юқори эканини тушуниш мумкин.
ЎҚИНГ: 2021 йилги Android'лар борасида 10 башорат
3. «Енгилроқ» One UI
Samsung'нинг Android прошивкалари тарихига эътибор берсак, кўплаб негативликни кўришимиз мумкин. Фойдаланувчилар TouchWiz'ни жуда ёмон кўришарди. Компания буни тушуниб, Samsung Experience'ни чиқарди. Бу қобиқ анчайин такомиллашган, камроқ тизим элементларига эга эди ва мултфилмсимон эмасди. Шундай бўлса-да, Samsung Experience ҳам одамлар кутгандек эмасди. Шундай сўнг, дизайнерлар дастурдан ортиқча элементларни олиб ташлаб, кўпчиликка ёққан One UI қобиқ дастурини тақдим қилди.
Бу ердаги тенденцияни сездингизми? Samsung ўзининг прошивкаларини қанчалар «енгил»лаштирса, одамларга бу шунчалар ёққан. Тўғри, Samsung One UI'ни бекор қилиб, Pixel UI ёки Oxygen OS'ларга ўтмайди, лекин One UI'даги ортиқча компонентларни қисқартириши, тизимни янада нафис ва силлиқ қилиши мумкин.
2021 йилда One UI 4.0 бизга Samsung тайёрлаган мукаммал Android амалиётини тақдим қилишига умид қиламиз. Ҳаммамиз ҳам телефонимиз устидан тўлиқ назоратга эга бўлиш ва смартфонимизда хоҳлаган нарсамизни ўзгартира олишни хоҳлаймиз. Samsung бундай амалиётни ўз мижозларига тақдим этишда ҳар доим илғор бўлиб келган. Умид қилиб қоламизки, Samsung янги йилда One UI дастуридан ҳар қандай ортиқча иловаларни олиб ташлайди.
4. Ихчам (лекин кучли) смартфонлар
Кўпчилигимиз кичик ҳажмли, чўнтагимизга сиғадиган, лекин кучли смартфон ишлатишни хоҳлаймиз. Samsung 2019 йилда Galaxy S10e моделини тақдим қилиш билан худди шундай амалиётни мижозларга тақдим этишга жуда яқин келганди. Ваҳоланки, бизга номаълум сабабларга кўра, «e» смартфонларини ишлаб чиқариш тўхтатилди ва 2020 йилда Samsung фақат катта ўлчамли смартфонларга ўзини урди. Galaxy S10e сингари смартфонларни ишлаб чиқаришни давом эттириш Samsung'га катта фойда келтириши эҳтимоли юқори эди.
Google Pixel 4a, Pixel 5, iPhone SE, iPhone 12 mini ва ҳатто Sony Xperia 5 II моделлари истеъмолчилар ихчам смартфонлар талабида эканини кўрсатиб берди.
Бироқ бунда муаммо шундаки, iPhone 12 mini ва Xperia 5 II'лардан бошқа ихчам смартфонлар айтарлик даражада кучли эмас. Бошқа ҳар қандай смартфонсоз компаниядан кўра Samsung'да 2021 йилда ушбу муаммонинг ечимини топиш имкони кўпроқ.
Лекин, афсуски, Galaxy S21 смартфонлари орасида бундай ихчам модель бўлмайди. Бироқ бу Samsung янги йилда ихчам смартфон чиқармайди дегани эмас, албатта.
5. Камроқ Exynos, кўпроқ Qualcomm
Ҳаммамизга маълумки, Qualcomm'нинг Snapdragon процессорлари Samsung ўзи тайёрлаган Exynos'лардан кўра унумдорроқдир. Samsung, процессори сабаб, бутунлай фарқли даражадаги унумдорликка эга смартфонларни турли бозорларда бир хил нархда сотади. 2021 йилда бунга барҳам бериш ёки ҳеч бўлмаса, бу ҳолатни камайтириш вақти келди.
Лекин ўз ўрнида айтиб ўтиш ҳам керакки, Exynos процессорлари борган сари яхшиланиб бормоқда. Ҳали реал шароитда кўрмаган бўлсак ҳам, миш-мишларга қараганда, Samsung'нинг Snapdragon 888'га жавоби бўлган Exynos 2100 чипи анчайин яхши кўрсаткичларни қайд этмоқда.
Яна шундай миш-мишлар тарқалганки, 2021 йилда камида битта Samsung смартфони бутун дунё бўйича (минтақадан қатъи назар) фақат Exynos чипли версияда чиқарилади.
Умид қилиб қоламизки, 2021 йилда Samsung процессорлар борасида мантиқий иш тутади. Компания Snapdrago/Exynos мувозанатини тенглаштириб, Шимолий Америкадан бошқа ҳудудларда ҳам Snapdragon'ли смартфонлар сота бошлашини кутиб қоламиз.
ЎҚИНГ: iPhone SE 3 нималари билан идеал ҳамёнбоп айфон бўлади?
