QLED дисплейли Samsung Galaxy Chromebook 2 ноутбуки тақдим қилинди
Ўтган йилнинг CES кўргазмасида Samsung AMOLED экранга эга илк Chromebook лептопини тақдим қилганди. Бу йил ҳам Samsung янги — QLED экран билан жиҳозланган илк Galaxy Chromebook 2 ноутбукини намойиш қилди.
Chromebook 2 2-таси-1да қурилма бўлиб, унинг 13.3 дюймлик тачскрин дисплейи 1,920х1,080 пиксел ўлчамига эга. HDR дисплей четларини ингичка ҳошиялар ўраб туради. Экранни қўл билан ёки USI Pen стилуси билан ишлатиш мумкин.
Chromebook 2 ўтган йилги «ака»сичалик ингичка ва енгил бўлмаса-да, 1.23 кг вазни ва 13.9 мм ўлчами билан анчайин енгил ноутбук ҳисобланади.
Ўтган йилги модель нархи 1,000 доллардан бошланган эди. Chromebook 2 эса бунинг ярим нархига — 550 долларга тенг. Сиз 550 доллар нархга Intel Celeron 5205Uʼли версиясини сотиб олишингиз мумкин. Агар унумдорлик юқорироқ бўлишини хоҳласангиз, 10-авлод Intel Core i3 10110U билан жиҳозланган версиясини ҳам сотиб олсангиз бўлади.
Лептоп 4/8ГБ тезкор, 64/128ГБ доимий хотирага эга. Корпусда microSD карта слоти ҳам бор. 45.5 Вт/соат аккумулятор сизга компьютердан 14 соат фойдаланиш имконини беради.
5 Вт лик иккита карнай Smart AMP функциясидан фойдаланди, бу эса овоз 178% баландроқ чиқади деганидир. Видео қўнғироқлар учун эса 720p веб-камера бор. Орқа томондан ёритилувчи клавиатура клавишлари эса кенгроқ бўлиб, бу матн тераётганда хатоликларни камайтиришга ёрдам беради.
Симсиз алоқа борасида, Chrome OS тизимида ишловчи лептоп Wi-Fi 6 (ах 2х2) ва Bluetooth 5.0'лар билан жиҳозланган. Симли алоқалар учун эса иккита USB-C порти, қулоқчин/микрофон тирқиши бор.
Samsung Galaxy Chromebook 2 Fiesta Red ва Mercury Gray рангларида сотилади. Илк сотувлар март ойи охирида АҚШда бошланади.
ЎҚИНГ: Dell янги Latitude 9000, 7000 ва 5000 лептопларини тақдим қилди