Galaxy S22+ ҳамда S22 Ultra'нинг 45 ваттда қувват олиши ёлғонми?

Galaxy S22+ ҳамда S22 Ultra'нинг 45 ваттда қувват олиши ёлғонми?

Samsung компанияси бу йилги Galaxy S22+ ҳамда S22 Ultra смартфонларининг қувватланиш имкониятини оширди. S22 модели 25 ватт билан чекланган бўлса, катта моделлар 45 ваттда заряд олиши мумкин. 

ЎҚИНГ: Xiaomi 12 Ultra янги Snapdragon чипи билан жиҳозланади: бу Snapdragon 8 Gen1 эмас 

Охирги йилларда смартфон ишлаб чиқаришда тезкор қувватлаш технологиясининг ўрни ошиб бормоқда. Ҳаттоки ҳозирда ўрта тоифадаги смартфонлар ҳам 65 ваттлик қувватлаш технологиясига эга бўлмоқда. 

Xiaomi ҳамда vivo каби компанияларнинг флагманлари эса 100-120 ваттда қувват олмоқда. Агар буни ҳисобга оладиган бўлсак, янги Samsung флагманларининг 45 ваттда қувват олиши оламшумул воқеа эмас. Боз устига бу фақат маркетинг учун қилинган бўлса. 

Хўш, ушбу икки қурилма қандай кучланишда қувват олади? GSMArena сайти тадқиқотчилари икки смартфонни оргинал 45 ҳамда 25 ваттлик Samsung қувватлагичлари, шунингдек, 65 ваттлик учинчи томон қувватлагичи билан зарядлаб кўришди. 

Шуни таъкидлаш керакки, иккита Samsung зарядловчи қурилмаси қувват етказиб бериш (PD) ва дастурлаштириладиган қувват манбаи (PPS) стандартларини қўллаб-қувватлайди, учинчи томон қувватлагичи эса фақат PD сертификатига эга. Хўш, натижалар қандай бўлди? 

Galaxy S22+ модели 25 ваттлик қувватлагич билан ярим соат вақт давомида 62%, 45 ваттлик билан эса 64% қувват тўплади. 

Galaxy S22 Ultra эса 25 ваттлик қувватлагич билан 61%, 45 ваттлик билан 60% қувват олди. 65 ваттлик учинчи томон қувватлагичи билан эса 65% қувват тўплади. 

Скриншот: GSMArena

25 ваттлик қувватлагич билан 0% дан тўлиқ қувватланиш учун S22+ модели 1 соат 2 дақиқа вақт сарфлаган бўлса, 45 ваттлик қувватлагич билан 1 соат 1 дақиқа вақт сарфлади. 

Худди шу жараён S22 Ultra моделида ўтказилганда ушбу смартфон 25 ваттлик қувватлагич билан тўлиқ қувватланиш учун 1 соат 4 дақиқа, 45 ваттлик билан 59 дақиқа, 65 ваттлик учинчи томон қувватлагичи билан эса 1 соат 2 дақиқа вақт сарфлади. 

Скриншот: GSMArena

Бу нимани англатади? Хўш, гарчи Samsung икки қурилманинг қувватланиш тезлигини оширган бўлса ҳам, смартфонларнинг 45 ваттлик оргинал Samsung қувватлагичи билан қувват олган вақт жараёни 25 ваттдаги қувватлагичникидан деярли фарқ қилмайди. 

Бундан ҳам ёмони, 2019 йилда Galaxy Note10+ билан худди шундай ҳолатда юз берган эди. Шундан сўнг компания Note20 Ultra'дан 45 ватт қувватлаш технологиясини олиб ташлади. Уни энди S22+ ва S22 Ultra моделларига қайтариб, хатолардан тўғри сабоқ чиқарганини кўрсатмоқчи. Афсуски, яна бир бор техник хусусиятлар варақаси ҳақиқий ҳаётдаги одатий фойдаланиш хусусиятларига мос келмади. 

Фото: GSMArena

Бундан иккита хулосага келиш мумкин. Биринчиси, гарчи қувватланиш тезлиги ошган бўлса ҳам, Galaxy S22 ва S22 Ultra аввалги моделлар каби тўлқи қувватланиш учун бир соатдан кўп вақт сарфлайди. 

Иккинчиси эса 45 ваттлик қувватлагични 50 доллар эвазига сотиб олишдан кўра, 20 долларга 25 ваттлик қувватлаш адаптерини олган яхшироқ. Чунки ушбу икки қувватлагич билан тўлиқ қувватланиш учун смартфонлар деярли бир хил вақт сарфлайди. 

ЎҚИНГ: Oppo Find X5 Pro смартфонига оид янги маълумотлар сиздирилди 

Сайтимизнинг энг чиройли расмларини Инстаграмдаги саҳифамизда томоша қилинг!