Poco X4 Pro 5G ва Poco M4 Pro смартфонлари тақдим этилди

Hasanboy
4516
01.03.2022 14:50

Xiaomi компанияси Poco линясига AMOLED дисплейида ишловчи иккита янги смартфонни қўшиб қўйди. Poco X4 Pro 5G янги такомиллашган камерага эга бўлди. M4 Pro эса ўтган йилнинг куз фаслида тақдим этилган Poco M4 Pro 5G'нинг 4G версияси ҳисобланади.

Poco X4 Pro 5G

Ушбу смартфон 120Hz экран янгиланиш частотаси ҳамда 360Hz сенсорли намуна олиш частотасини қўллаб-қувватловчи 1080х2400 пиксел резолюциядаги 6.67 дюймли AMOLED дисплейи билан жиҳозланган.

Экран ёрқинлик даражаси ҳам 450 нитдан 700 нитга ошган, максимал ёрқинлик эса 1200 нитга боради. Олд панель Gorilla Glass 5 шишаси билан ҳимояланган, бу борада ҳеч қандай ўзгариш йўқ.

Янги моделнинг асосан дисплей, камера ва аккумулятори яхшиланган. Чипсет каби бошқа компонентларда пасайиш кузатилган. Poco X4 Pro смартфони Snapdragon 695 чипи билан жиҳозланган.

6 нанометрлик жараён асосида яратилган ушбу чип Snapdragon 690'нинг янги авлоди бўлиб, унда 2.2 гигагертсли иккита Cortex-А76 ва 1.8 гигагертсли олтита А55 ядроси бўлганлиги учун янги чипининг унумдорлиги аввалгисидан 15% га юқорироқ. Adreno 619 гарфик процессорнинг унумдорлиги эса 30% га ошган. Бироқ ушбу чипсетнинг унумдорлик кўрсаткичлари X3 Pro'га ўрнатилган Snapdragon 860 чипидан пастроқ.

Смартфоннинг икки хил хотирага эга бўлган тури мавжуд: 6/128ГБ ва 8/256ГБ. Унда иккита SIM-карта учун уя бўлиб, биттасига microSD картасини қўйиш мумкин. MIUI 13 график қобиғида виртуал тезкор хотира ҳам мавжуд. 6ГБ тезкор хотирага эга бўлган моделларга 2ГБ, 8ГБ хотирага эга бўлган моделларга эса 3ГБ хотира қўшиб берилади. Смартфонда 5G тармоғи, NFC, инфрақизил порт ҳамда 3.5 мм аудио жек мавжуд.

Камера жиҳатидан қурилмада яхши ўзгаришлар бўлган, хусусан, қурилмага 108МП 1/1.56 дюймли катта сенсор ўрнатилган. Бу ўтган йилги моделдаги 48 МП 1/2.0 дюймли сенсордан анча яхшироқ. Камера линзаси f/1.9 диафрагмада бўлиб, 2.1µm микрон пиксел катталиги билан тунда янада сифатли суратларни олиш мумкин.

Смартфонга, шунингдек, 8МП ультракенг ҳамда 2МП макро камералар ўрнатилган. Сатҳ камера эса олиб ташланган. Олд томонда юмалоқ тирқишли 2.4 диафрагмадаги 16МП селфи камера жойлашган. Ўтган йилги моделга 20МП 2.2 диафрагмадаги селфи камера ўрнатилганлигини ҳисобга олсак, янги моделнинг селфи камерасида пасайиш кузатилган.

Poco X4 Pro моделидаги 5,000 мАс сиғимли аккумулятор 67 ваттда қувватланади (ўтган йилги модель 33 ватт эди). Қурилма қутисида қувватлаш адаптери бўлади. Тўлиқ қувватланиш учун смартфон 41 дақиқа вақт сарфлайди (X3 Pro модели 59 дақиқада).

Смартфон ўлчамлари кичрайди: қалинлик 8.12 мм (9,4 мм аввалги модель), оғирлик эса 205 граммни ташкил қилади (215 грамм аввалги модель). Қурилма IP53 стандарти ҳамда иккита карнайга эга.

Poco X4 Pro 5G'нинг Laser Black, Laser Blue ва Poco Yellow рангли турлари мавжуд.

Қурилманинг нархи қуйидагича:

6/128ГБ - 300 евро

8/256ГБ - 359 евро

Смартфонни эртароқ сотиб олган харидорлар 50 евролик чегирмага эга бўлишлари мумкин.

Poco M4 Pro

Ушбу моделнинг 5G версияси ўтган йили тақдим этилган эди. Ҳозир унинг 4G версияси чиқди. Янги моделга бошқа чип ўрнатилди. Эътиборга молик томони ушбу модель Poco M сериясида AMOLED дисплейига эга бўлган илк смартфон бўлди. Яъни 5G версиядаги 6.6 дюймли IPS LCD ўрнига 6.43 дюймли AMOLED дисплей ўрнатилди.

Дисплей 1080х2400 пиксел резолюцияда бўлиб, у 90Hz экран янгиланиш частотаси ҳамда 180Hz сенсорли намуна олиш частотасини қўллаб-қувватлайди. Олд панель Gorilla Glass 3 шишаси билан ҳимояланган. Экраннинг одатий ёрқинлик даражаси 700 нит, максимал ёрқинлик эса 1000 нитни ташкил қилади.

Қурилмага Helio G96 чипи ўрнатилган. 5G модель эса Dimensity 810 5G чипига эга эди. Mali G57 MC2 гарфика учун жавоб беради. Helio G96 чипи 12 нанометрлик жараён асосида яратилган. Шунинг учун унинг қувват самарадорлиги юқори эмас.

M4 Pro 4G'нинг 4/64ГБ хотирага эга тури мавжуд эмас. Унинг 6/128ГБ ҳамда 8/256ГБ хотирага эга турлари мавжуд. Хотирани microSD картаси билан кенгайтириш мумкин. Ушбу моделда ҳам виртуал тезкор хотира бор. 8/256ГБ версияга 3ГБ хотира қўшиш мумкин.

Қурилмага бошқа камералар ўрнатилган. Мисол учун, 5G моделга ўрнатилган 50МП камера ўрнига f/1.8 диафрагмадаги 64МП камера ўрнатилган. Шунингдек, орқа панелдан 8МП ультракенг ҳамда 2МП макро камералар ўрин ҳам. Селфи камера резолюцияси 16МП ташкил қилади.

Смартфондаги 5,000 мАс сиғимли аккумулятор 33 ваттда қувват олади. Тўлиқ қувватланиш учун қурилма бир соатдан кўпроқ вақт сарфлайди.

Аввалги модель каби Poco M4 Pro ҳам 3.5 мм аудио жек, иккита карнай, NFC ҳамда инфрақизил портга эга. Гарчи унга AMOLED дисплейи ўрнатилган бўлса-да, бармоқ изи сканери ён томонда қолган.