Россияликлар энди "тишланган олма" сотиб олишолмайди
Бир неча кун аввал Украина бош вазир ўринбосари Михайло Федоров ўзининг Twitter саҳифасида россиялик фойдаланувчиларига маҳсулот ва хизматларни етказиб бериш, шу билан бирга App Store'ни блокировка қилишни сўраб Apple компанияси раҳбари Тим Кукга очиқ хат йўллаганини хабар қилган эдик.
Гарчи App Store иловалар дўконида ҳали Россияда блокланмаган бўлсада, эндиликда компания расман ўз қурилмаларини Россия учун етказиб бермаслигини маълум қилди.
"Биз Россиянинг Украинага бостириб киришидан чуқур хавотирдамиз ва зўравонликдан жабр кўраётган барча одамлар билан биргамиз. Биз гуманитар саъй-ҳаракатларни қўллаб-қувватлаймиз, қочқинлар инқирози учун ёрдам берамиз ва минтақадаги жамоаларимизни қўллаб-қувватлаш учун қўлимиздан келганини қиламиз", — дейилади Apple баёнотида.
Ҳозирда Apple'нинг Россиядаги сайтидан ҳеч қандай iPhone, iPad, MacBook ёки бошқа Apple қурилмаларини сотиб олиб бўлмайди ва етказиб бериш ҳам тўхтатилган. Шунингдек, мамлакатдаги Apple'нинг расмий дилери бўлган rе:Store бугундан барча филиалларини ёпиб қўйган.
Шу билан бирга, Apple Pay тўлов хизмати ва яна бошқа (айнан қайсилари эканлиги айтилмаган) компания хизматларини кўрсатиш тўхтатиб қўйилган. Россиянинг RT ва Спутник иловалари Россиядан ташқари мамлакатларда App Store'дан олиб ташланган. Украина фуқаролари учун хавфсизлик ва эҳтиёт чораси сифатида Apple Maps'да Украинадаги йўл ҳаракати ва жонли ҳодисалари ўчирилган.
"Биз вазиятни баҳолашда давом этамиз ва амалга оширилаётган чора-тадбирлар юзасидан тегишли ҳукуматлар билан алоқадамиз. Биз бутун дунё бўйлаб тинчликка чақираётганларга қўшиламиз" дейди компания ўз баёноти охирида.
Бундан аввал, Украина ва Россия ўртасидаги воқеалар бошланган пайтида Apple iPhone смартфонлари ўз нархининг 2 бараварига кескин кўтарилиб кетган эди.
