iPhone 14 қаторидаги моделларнинг бири бироз кечикиб чиқарилиши мумкин

iPhone 14 қаторидаги моделларнинг бири бироз кечикиб чиқарилиши мумкин

Apple ўзининг бу йилги янги авлод флагманларини кузда, аниқроғи эса, 13 сентабрда тақдим қилишни режалаштирмоқда. Бироқ, сўнгги янгиликларга кўра, iPhone 14 деб номланадиган смартфонлар қаторидаги бир модел, iPhone 14 Мах кутилганидан бироз кечикиброқ чиқарилиши мумкин.

Nikkei Asia нашрининг хабар беришича, Apple смартфонлари йиғиладиган Хитойнинг Шанхай шаҳри Covid ҳолатлари кўпайиши туфайли март ойи охиридан бошлаб бир ойларча локдаунга тушиши бўлажак iPhone 14 ишлаб чиқарилишининг режадан ортда қолишига сабаб бўлган. Гарчи карантин қоидалари ҳозирда бироз юмшатилган ва Apple ишлаб чиқарувчиларга йўқотилган вақтни қоплаш учун ишни тезлаштириш ҳақида кўрсатма берган бўлса-да, маҳсулот учун таъминот занжири узилишда давом этмоқда. Ўтган ҳафтада эса, Шанхай локдауни Apple'нинг апрел-июн ойидаги даромадига сезиларли даражада таъсир қилиши, хусусан, компания 8 миллиард доллар йўқотиши мумкинлиги хабар қилинган эди.

Apple бу йили фақат тўртта моделдаги iPhone чиқариши кутилмоқда. Улар иккита 6.1 дюймли ва иккита 6.7 дюймли моделлар бўлиб, шартли равишда iPhone 14, iPhone 14 Pro ва iPhone 14 Мах ва iPhone 14 Pro Мах деб номланади. Маълумотларга кўра, тўрттала моделлар ҳозирда муҳандислик текшируви жараёнида. Ушбу босқичда смартфон учун оммавий ишлаб чиқариш бошланишидан олдин унинг барча қисмлари йиғилади. Таҳлилчи Жефф Пу сўзларига кўра, Шанхай локдауни сабаб iPhone 14 Мах ана шундай муҳандислик текширувида уч ҳафтага кечга қолган ва эндиликда унинг чиқарилиши кутилганидан бироз кечроқ бўлиши мумкин.

Бу Apple'нинг смартфонлари чиқарилишининг биринчи марта кечикиши эмас. Худди шундай ходиса 2020 йилги iPhone 12 қатори учун ҳам рўй берган эди. Ўшанда компания ўз маҳсулотини бир ой кечикиб, октабр ойида чиқарган эди.

ЎҚИНГ: Apple Watch 8 рендерлари тарқатилди

Terabayt.uz сайтининг видеолари: Youtube'даги каналимизда!