Xiaomi 12 Ultra'нинг техник жиҳатлари маълум бўлди
Янги Xiaomi 12 Ultra смартфонининг камералари Leica компанияси билан ҳамкорликда ишлаб чиқарилади. Смартфоннинг ўзи эса июль ойида тақдим этилиши режалаштирилган. Хўш, камера техник кўрсаткичларида қандай ўзгаришлар бўлади?
Миш-мишларга қараганда Xiaomi 12 Ultra'нинг камера техник кўрсаткичлари кўп жиҳатдан Mi 11 Ultra'никига ўхшайди. Яъни янги моделга 50МП асосий камера, 48МП 5х телефото камера ва 48МП ультракенг камера ўрнатилади.
Ушбу учта камера ёнидан эса янгилик сифатида 3D ToF сенсори ўрин олади. Селфи камеранинг резолюцияси ўтган йилги модель каби 20 мегапиксел бўлади.
Дисплейнинг техник жиҳатлари эса Xiaomi 12 Pro моделиникига ўхшаш бўлиши кутилмоқда. Яъни Xiaomi 12 Ultra'га 6.7 дюймли 120 гертс QHD+ резолюциядаги LTPO AMOLED дисплейи ўрнатилади. Mi 11 Ultra'нинг дисплей ҳажми 6.81 дюйм бўлиб, унда LTPO технологияси йўқ эди.
Смартфон 8/12ГБ тезкор LPDDR5 хотира ва 256/512ГБ UFS 3.1 доимий хотирага эга бўлган Snapdragon 8+ Gen1 чипи билан жиҳозланади.
Қурилма, шунингдек, 67 ватт симли, 50 ватт симсиз қувватланишни қўллаб-қувватлайди 4,800 мАс сиғимли аккумулятор билан жиҳозланиши айтилмоқда. Ўтган йилги Mi 11 Pro модели 120 ватт қувватлаш тезлигига эга бўлган эди. Xiaomi 12 Ultra ҳам 120 ваттда қувват олиши айтилаётган эди, бироқ буни тасдиқлайди ҳеч қандай маълумот мавжуд эмас.
