Самарқандда 5G тармоғи синовдан ўтказилмоқда
АКТ вазири Шерзод Шерматов ўзининг Telegram каналида хабар беришича, Самарқанд туризм марказида 5G тармоғини тест қилиш ишлари бошланган.
Вазир улашган скриншотдан кўриш мумкинки, UzMobile алоқа оператори билан синовдан ўтказилаётган 5G тезлиги секундига салкам 900 мегабитни ташкил қилади.
"Ушбу марказ нафақат халқаро тадбирлар ўтказиладиган ва туристлар яхши дам оладиган жой бўлмоқда, балки Ўзбекистонда биринчи маротаба барча мобил алоқа операторлар ҳамкорликда антенна инфратузилмасини битта мачтада кўтариб, бинолар ичида ҳам Active DAS тизимини ҳамкорликда ишлатиб, юқори тезликдаги сифатли хизматлар кўрсатишларига имкон яратилмоқда", дейди Шерматов.
Таъкидлаш жоизки, 24-27 октабр кунлари бўлиб ўтадиган бу йилги АКТ ҳафталиги айнан шу Самарқанд туризм марказида ўтказилиши режалаштирилган.
