Redmi K50S Pro моделининг техник кўрсаткичлари маълум бўлди
Redmi K50S Pro моделига оид янги маълумотлар тарқалишни давом этмоқда. Миш-мишларга кўра, ушбу қурилма 200МП камерага эга бўлган илк Xiaomi смартфони бўлиши мумкин.
K50S Pro дунёдаги 200 мегапикселли биринчи смартфон ҳам бўлиши мумкин, бироқ бу Motorola компаниясининг янги Moto Edge 30 Ultra моделининг тақдим этилиш санасига боғлиқ. Ушбу смартфон июль ойида тақдим этилиши керак эди. Афтидан, бу жараён бироз кечикади.
200МП камера ўз йўлига, аммо смартфон Snapdragon 8+ Gen1 чипи билан жиҳозланиши унинг нархини ошириб юборади. Орқа панелдаги қолган икки камера оддийроқ - 8МП ультракенг ва 2МП макро. Олд томонда эса 20МП селфи камера жойлашади. Бу Ёгеш Брар инсайдери томонидан берилган маълумотлар ҳисобланади.
Смартфоннинг қолган техник кўрсаткичларига тўхталадиган бўлсак, унга HDR10+ ва 120 гертс янгиланиш частотасида ишловчи 6.67 дюймли AMOLED дисплейи ўрнатилади. Қурилманинг 8/128ГБ ҳамда 12/256ГБ хотирага эга версиялари сотувга чиқади.
Инсайдер, шунингдек, смартфон 120 ваттда қувват олувчи 5,000 мАс сиғимли аккумулятор билан жиҳозланиши ҳақида хабар бермоқда. Қурилма экран остида жойлашган бармоқ изи сканери ва стерео динамикка эга бўлади.
Pro модель билан биргаликда оддий K50S модели ҳам тақдим этилади. Унга MediaTek Dimensity 8100 чипи ўрнатилиши кутилмоқда. Ушбу икки модель катта эҳтимол билан халқаро бозорга Xiaomi 12T ва Xiaomi 12T Pro номи остида сотувга чиқади.
