Миш-мишлар тўғри бўлиб чиқди — Galaxy S23 серияси фақат Snapdragon чипи билан жиҳозланади
Samsung компаниясининг Exynos чиплари Galaxy S23 сериясига ўрнатилмайди. Бу йилги S22 моделларининг фақатгина Европа бозори учун ишлаб чиқарилган версиялари Exynos 2200 чипи билан жиҳозланган эди. Қолган ҳудудлар учун ишлаб чиқарилган моделлар эса Snapdragon 8 Gen1 чипига эга бўлди.
Qualcomm бош директори Криштиану Амон иккинчи чоракдаги даромадлар сўровида Galaxy S22 моделларининг 75 фоизи Snapdragon чипи билан жиҳозланганини маълум қилди.
Бош директор таҳлилчиларнинг Galaxy S23 серияси фақат Snapdragon 8 Gen2 чипи билан жиҳозланиши ҳақидаги фикрларига қўшилган ҳолда, келгуси йилда Snapdragon чипли Galaxy смартфонларининг сонини ошишини таъкидлаб ўтди. «Шартномага қадар Galaxy S22 моделларининг 75% Snapdragon чипи билан жиҳозланиши керак эди. Ушбу нисбат S23 ва ундан кейинги версияларда янада ортади», деди Амон.
Qualcomm'нинг Samsung билан ҳамкорлиги «Galaxy смартфонларидан ташқари, Galaxy Book ноутбуклари, Windows компьютерлари, Galaxy планшетлари, VR ва бошқа қурилмаларни ўз ичига олади», деди Амон. Икки компания 3G, 4G, 5G ва 6G қурилмаларини ўз ичига олувчи патент лицензиялаш шартномасини 2030 йилгача узайтирди.
Samsung Exynos чипларини ишлаб чиқариш давом этишини айтди. Бироқ уларни ишлаб чиқариш жараёни қайта ташкил этилиши зарур. Қисқа муддатда компания Exynos чипларини смарт соатларга ўрнатишни бошлаши мумкин. Ўрта ва бошланғич даражадаги Exynos чиплари ҳам бор, Samsung улар учун янги мижозларни қидирмоқда.
Бу расман тасдиқланмаган бўлса-да, Samsung янги смартфон чипсетини ишлаб чиқиш учун жамоа йиғгани айтилмоқда. Аммо бу жараён бироз вақт олиши мумкин ҳамда Galaxy S смартфонларини ишлаб чиқаришда 2024 йилгача Snapdragon чипларидан фойдаланиш режалаштирилган. Миш-мишларга кўра, икки йил ичида компания янги чипсетни нолдан бошлаб тузиб чиқишга ҳаракат қилади .
Биринчи авлоддан бери Galaxy Z серияси Snapdragon чиплари билан жиҳозланиб келмоқда. Ушбу анъана янги Galaxy Z Flip4 ва Z Fold4 моделларида ҳам давом этади. Ушбу букламафонлар катта эҳтимол билан Snapdragon 8+ Gen1 чипига эга бўлади.
Qualcomm'нинг Snapdragon 8 Gen2 чипи ноябрь ойининг ўртасида тақдим этилади. Ушбу чип билан жиҳозланган илк смартфон эса декабрь ойида эълон қилиниши кутилмоқда. Galaxy S23 сериясининг тақдимоти 2023 йилнинг бошида бўлиб ўтади.
