Смартфонлардаги топ 5 энг кераксиз хусусиятлар
Технологиянинг кундан-кунга ривожланиб бориши билан бирга мобил телефонларнинг функционаллиги ҳам ошиб бормоқда. Бироқ, смартфонларимизда кўплаб фойдали функциялар билан биргаликда биз умуман фойдаланмайдиган ёхуд кераксизлари ҳам мавжуд. "Интернет аҳолиси"нинг маълум қилишича смартфонлардаги қуйидаги хусусиятлар умуман кераксиз деб ҳисобланади.
1. Тескари зарядлаш
Маълум бўлишича, смартфонлардаги энг кераксиз хусусият - бу "тескари қувватлаш"дир. Ушбу функция фойдаланувчиларга телефонлари орқали бошқа қурилмаларга қувват беришлари имконини беради. Лекин, кўпчилик смартфон эгалари бунинг қандай ишлаши ва ҳатто, нима учун бу уларнинг телефонларида борлигини билишмайди. Тўғрида, ўзи 5,000 mAh батарея зўрға бир кунга етаётган бўлса, у билан бошқа нарсаларни зарядлаб нима кераги бор? Агар, мабодо, ундан фойдаланмоқчи бўлган тақдирингизда ҳам, унинг тезлиги (ҳамма смартфонда ҳар хил бўлади, ўртача 5-10W) жуда-жуда секин бўлади. Бундан ташқари, кўпчилик смартфон қувватини бу тарзда сарфлаш унинг батареясини кучсизлантиришига ишонади.
2. Эгилган экранлар
Смартфонлардаги яна бир фойдасиз хусусият - уларнинг эгилган ён томон экранлари бўлиб, айрим фойдаланувчиларга кўра, бу телефонларни шунчаки қимматлаштиради холос. Айтиш керакки, ён томони эгилган смартфонлар ажойиб ва футуристик кўринади, лекин шунчаки дизайн ўзгариши учун юз долларлаб ортиқча пул тўлаш зарурмикин? Биласизми, агар эгилган экранли смартфонни синдириб қўйсангиз, уни янгилаш учун сизга яна битта смартфон пули керак бўлади.
3. Иловалар кутубхонаси (iPhone)
iPhone эгалари кераксиз деб топган функцияларнинг бири App Library бўлиб, кўпчиликнинг фикрича ушбу хусусият етарлича ақлли эмас, кўпчилик эса унинг борлигини ҳам билмайди. Маълумот учун: App Library асосий экраннинг ўнг томондан энг охирги саҳифадан кейин жойлашган бўлиб, у ерда сиз иловаларингиз сараланган папкаларда сақлашингиз мумкин.
4. RAM кенгайтириш
Android смартфонлардаги шубҳасиз фойдаси йўқ бўлган функцияларнинг яна бири оператив хотирани кенгайтириш бўлиб, бунда қурилмадаги бир неча GB ички хотира ресурслари оператив хотирага айлантирилади. Бироқ, RAM кўпайтириш учун қанча кўп ички хотира ажратманг, у билан смартонфингиз тез ишлайдиган бўлиб қолмайди, лекин аксинча бўлиши эҳтимоли юқори. Таъкидлаш керакки, ушбу технология Android қурилмалари учун янги бўлиб, у ҳали яхши ривожланмаган.
5. Перископ камера
"Нима учун мен 100 метр узоқликдаги нарсани суратга олиш учун смартфондан фойдаланишим керак? Бу худди "туя ҳаммомни орзу қилибди" дегандек гап. Мен ҳатто смартфонимда перископ камераси борлигини унутиб юборганман", дейди смартфон эгаларидан бири перископ камераси ҳақида. Албатта, чумчуқ сўйса ҳам қассоб сўйсин, смартфон ҳеч қачон ҳақиқий камера ўрнини боса олмайди. Кўпчилик учун перископ камера линзаларининг бўлмаслиги ҳеч нарсани ўзгартирмайди.
Қўшимчасига, интернет аҳолисининг сўзларига кўра, смартфонлардаги имо-ишоралар ва ҳаракатлар билан амалга ошириладиган функциялар ва пулт хусусияти ҳам кераксиз ва фойдасиздир.
