Samsung расман Galaxy Watch5 ва Watch5 Pro соатлари тақдим қилди

Samsung расман Galaxy Watch5 ва Watch5 Pro соатлари тақдим қилди

Кеча бўлиб ўтган Unpacked тақдимотида Samsung Galaxy Fold4 ва Flip4 букламафонлари билан биргаликда Galaxy Watch5 смартсоатлари қаторини ҳам эълон қилди.

Янги Galaxy Watch 5 серияси билан Samsung ўз ақлли соатлари қаторини яна ўзгатирмоқда. Бундан олдинги Galaxy Watch 4 серияси Galaxy Watch Active линиясини ребрендинг қилган бўлса, бу йилги Galaxy Watch серияси ўзининг Galaxy Watch 5 Pro, янги модели билан Galaxy Watch Classic'ни алмаштиради. Шундай қилиб, биз ҳозир оддий Galaxy Watch 5 ва премиум хусусиятларга эга Galaxy Watch 5 Pro моделлари билан танишамиз.

Galaxy Watch 5

Энг биринчи бўлиб Galaxy Watch 5 моделидан гап бошлайдиган бўлсак, у икки хил: 40мм ва 44мм ўлчамда чиқарилади. Уларнинг иккови ҳам алюминий корпус билан чиқарилган бўлиб, бир-бирларидан дисплей, батарея ва рангларда фарқ қилади. Кичик модел 1.2 дюймли дисплейга эга бўлса, катта модел 1.4 дюймли дисплейга эга ва улар сафир кристал ойна билан таъминланган. Компаниянинг маълум қилишича, бу олдинги Galaxy Watch 4 ойнасига қараганда 1.6 марта кучлироқдир. Ички томондан эса Galaxy Watch 5 сезиларли даражада қувват яхшиланишига эга. Соатнинг 40мм моделига 284 мА/с, 44 мм модели эса 410 мА/с батарея ўрнатилган бўлиб, Samsung'га кўра, уларнинг қуввати 50 соатгача етиши мумкин. Шунингдек, зарядланиш тезлиги ҳам анча яхшиланганлиги ва Galaxy Watch 5 ярим соатда 45% гача қувватлана олиши айтилмоқда.

Galaxy Watch 5 турли хил рангларда

Кичикроқ ўлчамдаги Watch5 пушти, графит, олтин рангдаги силикон камарлар билан кулранг, олтинранг ва графит рангларида, каттароқ ўлчамдаги Watch5 эса сафир, графит, оқ рангли силикон белбоғлар билан сафир, кулранг ва графит рангларида $279.99 бошланган нархда сотувга чиқарилади.

Galaxy Watch 5 Pro

Galaxy Watch 5 Pro моделига келадиган бўлсак, у фақат 45 мм ўлчамда чиқарилади. Афсуски, Galaxy Watch 4 Classic'да бўлгани каби янги Pro моделда жисмоний айланадиган рамка мавжуд эмас. Samsung ушбу хусусиятни фақат Watch4 Classic учун эксклюзив қилиб қолдирди.

Galaxy Watch 5 Pro

Watch5 Pro оддий моделдан фарқли ўлароқ титан корпус билан ва оддий силикон тасмадан кўра чидамлироқ бўлган D-Buckle камари билан жиҳозланган. Шунингдек, унинг сафир кристал ойнаси олдингиз Galaxy Watch 4 ойнасидан икки карра кучлироқ. Батареяси ҳам бошқаларникидан анча катта: 590 мА/с ва у 80 соатгача етади. Pro модел Black Titanium ва Gray Titanium рангларида, қора ва кулранг рангли белбоғ билан $499.99 нархда сотувга чиқарилади.

Иккала Galaxy Watch 5 моделларига ҳам AMOLED дисплей билан 1.18 гигагертсли Exynos W920 процессори, 1.5GB RAM ва 16GB ички хотира ўрнатилган бўлиб, улар Google'нинг Wear OS 3.5 версиясига асосланган One UI Watch 4.5 қобиғида ишлайди. Худди Galaxy Watch 4 каби янги моделлар ҳам IP68 чанг ва сувга чидамлилик сертификати ва 5ATM гача сув ўтказмаслик хусусиятига эга. Моделларнинг иккови ҳам қондаги кислород миқдори, юрак уриш тезлиги, тахминий стресс даражасини аниқлаш имконини берадиган учлик сенсорларни ўз ичига олган BioActive Sensor чипига эга ва энди у янги моделларда янада аниқроқ ишлайди, чунки улар тери билан контакт қилиш учун каттароқ сирт майдонига эга. Шунингдек, Galaxy Watch 5 қатори ЭКГ, қон босими мониторинги ва тана ҳароратини аниқлаш сенсори билан биргаликда хуррак отишни аниқлаш ва уйқу вақтингизни яхшилаш учун ўзингизга мослаштирилган "уйқу мураббийси" хусусиятига ҳам эга. Қўшимчасига соатларда GPS, NFC, Bluetooth 5.2 ва Wi-Fi функциялари ҳам бор.

Galaxy Watch 5 қатори Golf нашрида

Соатларнинг LTE вариати ихтиёрий бўлиб, улар $50 қимматроқ туради. Шунингдек, Galaxy Watch қатори махсус Golf нашрида ҳам чиқарилади ва унинг Bluetooth версияси $329 нархда бошланади.

Galaxy Watch5 қаторига ҳам ҳозирдан буюртма бериш мумкин, ёки 26 августдан савдо дўконларидан сотиб олса ҳам бўлади. Айтиш керакки, сиз Bespoke нашри билан 1000 хил ранглар комбинатиясидан ўзингизга ёққан рангдаги соатга буюртма беришингиз мумкин. 

ЎҚИНГ: Samsung расман Galaxy Z Flip4 букламафонини тақдим қилди

Сайт янгиликларидан доимий хабардор бўлиш учун Телеграм каналимизга қўшилинг!