Telegram'да юзернеймлар билан боғлиқ узоқ кутилган ўзгариш
Telegram фойдаланувчилари ўз профиллари ёки оммавий гуруҳ/каналлари учун @username (юзернейм), яъни "фойдаланувчи номи"ни қўйишлари мумкин. Бу уларни мессенжерда глобал қидирув орқали тез ва осон топиш имконини беради. Юзернеймларнинг ҳар бири ноёб бўлиб, улар бир-бирини такрорламайди. Айтиш керакки, Telegram'да юзернемлар "ким биринчи олса ўшаники" тамойилида тарқатилади ва уларни сониялар ичида, осонгина банд қилиш мумкин. Шу сабаб платформада киберсквоттинг, яъни таниқли компания, брендлар ёхуд машҳур шахсларнинг исмлари билан юзернеймларни шунчаки банд қилиб олиб, уларни сотиш ҳолатлари жуда авж олган.
Маълум бўлишича, Telegram сўнгги бир неча кун ичида узоқ вақтдан бери шунчаки банд қилиб келинган ёхуд 1 йилдан ортиқ вақт давомида контент жойланмаган юзлаб оммавий каналлар юзернеймларини ҳеч қандай огоҳлантиришсиз олиб қўйган. Албатта, олиб қўйилган юзернеймларни яна қайта банд қилиш мумкин бўлади, лекин бу дарҳол амалга ошмайди ва бир неча соат кутиш керак бўлади.
Хабарларга кўра, бу синов амалиёти бўлиб, келажакда Telegram'да юзернеймларни банд қилиш тизими янгиланиши мумкинлиги айтилмоқда.
Таъкидлаш жоизки, агар сиз хоҳлаган юзернейм Telegram'да банд бўлса ва сиз ундан Facebook, Twitter ва Instagram платформаларининг ҳеч бўлмаганда иккитасида фойдаланиб келаётган бўлсангиз, унда Telegram'да банд қилинган юзернеймни @Username_bot орқали талаб қилишингиз мумкин.
ЎҚИНГ: Дуров бир неча ҳафта ичида Telegram'га яна янги функциялар қўшилиши маълум қилди
