"Far Out" тақдимотидан олдин Apple ўзининг АR/VR қурилмалари учун савдо белгиси аризаларини топширгани маълум бўлди

Bloomberg нашрининг хабар беришича, Apple ўзининг анчадан бери миш-миш қилиб келинаётган AR/VR қурилмасининг моделлари учун Reality бренд номи остида бир нечта савдо белгиси аризаларини топширган. Маълум бўлишича, аризалар АҚШ, Европа Иттифоқи, Буюк Британия, Канада, Австралия, Янги Зеландия, Саудия Арабистони, Коста-Рика ва Уругвай мамлакатларида топширилган.

Айтиш керакки, аризалар шахсан Apple томонидан топширилмаган, чунки Apple каби компаниялар ўз режаларини махфий сақлаш учун патент ёки савдо белгиси учун аризалар беришда кўпинча фақат қоғозда мавжуд бўлган "қобиқ" компаниялар номларидан фойдаланадилар. Шундай қилиб, Apple'нинг сирли маҳсулоти учун аризалар Immersive Health Soultions компанияси томонидан топширилган бўлиб, Bloomberg берган маълумотларга кўра, Делавер штатида жойлашган ушбу компания Corporation Trust корпорацияси томонидан рўйхатга олинган, бу эса realityOS савдо белгиси учун ариза топширган бошқа фирмаларни рўйхатга олган корпорациядир.

Reality One савдо белгиси учун берилган ариза. Фото: АҚШ Савдо белгиси ва патент идораси (Bloomberg орқали)

Берилган учта алоҳида аризаларда "Reality One", "Reality Pro" ва "Reality Processor" учун савдо белгилари кўрсатилган бўлиб, уларнинг барчаси маҳсулот "виртуал ва кенгайтирилган реаллик бош қурилмалари, кўзойнаклар ва ақлли кўзойнаклар" эканлигини таъкидлайди. Айтиш мумкинки, "Reality One" қурилманинг оддий модели бўлса, "Reality Pro" унинг техник хусусиятлари кучайтирилган, юқори даражадаги версияси бўлади. "Reality Processor" эса қурилмалар учун ишлатиладиган процессор номи бўлиши мумкин.

Бироқ, аризалар ҳали қабул қилинмаган, шундай экан, Apple келажакда ўзининг AR/VR қурилмалари учун ушбу номлардан фойдаланиши аниқ эмас. Гарчи миш-мишлар тўғри бўлса ҳам, Apple 2023 йил бошигача уларни тақдим қилмаслиги аввал айтилган эди. Шундай экан, iPhone 14 тақдим қилинадиган "Far Out" тақдимотида улар кўриниш бермаслиги мумкин.

Apple ушбу янги AR/VR қурилмалари виртуал оламга кириш эшикларини очиб беради ва фойдаланувчиларга кенгайтирилган реаллик тажрибасини улашади. Купертинолик компания ўзининг бу маҳсулоти билан Facebook, Instagram, WhatsApp бош эгаси, Meta компаниясига ашаддий рақиб бўлади. 

ЎҚИНГ: Текис монитор олган яхшими ёки букланадиган? Нимага иккаласи ҳам эмас?

Сайт янгиликларидан доимий хабардор бўлиш учун Телеграм каналимизга қўшилинг!