iPhone 6'нинг даври ўтди
Apple'да ажойиб анъана мавжуд. Компания ўзининг сотувга чиқарилмаганига 5 йилдан ошган ва 7 йилдан кам бўлган маҳсулотларини "винтаж"лар, ёхуд анча олдин ишлаб чиқарилган, классик маҳсулотлар қаторига қўшади. Ва бир неча кун аввал уларнинг қатори яна биттага кўпайди - iPhone 6 ҳам энди "винтаж" смартфон (9tоМаc орқали).
Ҳа, ишониш қийин, лекин iPhone 6 сотуви тўхтатилганига ҳам 5 йилдан ошди. Қизиғи шундаки, iPhone 6'нинг "акаси", iPhone 6 Plus аллақачон винтажлар қаторида: Apple уни бу рўйхатга жорий йил февралида қўшган эди. Сабаби компания iPhone 6 моделини 2017 йил февралида Осиё, кейинчалик Европа, май ойида Америка ва июлда Канада бозори учун ўрта даражадаги бюджет смартфон сифатида қайта сотувга чиқарган.
Компания винтаж маҳсулотлари учун ҳам улар бу рўйхатга қўшилганларидан кейин 2 йилгача эҳтиёт қисмлар ва таъмирлаш хизматларини тақдим қилади.
iPhone 6 ва iPhone 6 Plus смартфони илк маротаба 2014 йил сентябрида iOS 8 билан тақдим қилинган. Компания iOS 12 дан кейин уларни дастурий таъминот янгиланишлари билан таъминлашни тўхтаган, аммо, ҳали ҳам уларга хавфсизлик янгилашларини юбориб туради.
Смартфон компаниянинг NFC хусусиятига эга илк смартфонларидан бири бўлиб, у 4.7 дюймли Retina HD дисплей, 64 битли А8 чипсет, 1ГБ оператив ва 16/32/64/128 ГБ доимий хотира, 8 мегапикселли орқа ва 1.2 мегапикселли олд камера, 1810 мА/с батарея ва бармоқ изини аниқлаш сенсори билан жиҳозланган эди.
iPhone 6 ва 6 Plus смартфонлари 2017 йил июл ойидаги ҳолатга кўра дунё бўйлаб 222.4 миллиондан ортиқ сотилган бўлиб, улар компаниянинг энг кўп сотилган смартфонлари ҳисобланади.
ЎҚИНГ: Ортга назар: iPhone 6 - Apple ҳалигача фойдаланадиган дизайндаги смартфон
