Кореялик техно-гигант ўз бизнесини Россиядан Ўзбекистонга кўчириш ниятида
Kommersant нашри ўзининг маиший техника бозоридаги манбасига асосланиб хабар беришича (iXBT.com орқали), Жанубий Кореянинг LG компанияси раҳбарияти Россиядаги заводни ёпиш ва ишлаб чиқаришни Ўзбекистоннинг Artel заводларига кўчиришни муҳокама қилмоқда.
Маълум бўлишича, Россиядаги LG компанияси топ менежментининг бир қисми аллақачон Тошкентга кўчиб ўтган. Бироқ, Artel Electronics айни пайтда LG билан ҳамкорлик йўқлигини маълум қилган, ёхуд музокаралар ҳақидаги маълумотлар ошкор қилинмаган.
LG учун Ўзбекистон ягона вариант эмас. Компания 1998 йилдан бери Қозоғистоннинг Олмаота шаҳридаги заводини юритиб келган, лекин у бир неча йил аввал ёпилган. Шунга қарамай, мамлакатнинг Рақамли ривожланиш, инновация ва аерокосмик вазирлиги LG билан янги завод очиш бўйича музокаралар олиб бормоқда.
LG'нинг Россиядаги ритейлери берган маълумотларга кўра, компания маҳсулотлари улуши ўтган йилгига қараганда сезиларли даражада тушиб кетган. Финам компанияси таҳлилчиси Леонид Делициннинг таъкидлашича, LG ўзининг Россиядаги бизнеси тақдири ҳақида бирор-бир қарор қабул қилиши керак.
"Ўзбекистонда Корея билан ҳамкорликда 80 та корхоналар фаолият юритади. Мамлакат ривожланишидан аввалги, совет давридаги маълумотларга кўра, мамлакатда 200 минг корейс яшайди, шунинг учун икки мамлакат ўртасидаги турли хил бизнес алоқаларидан ажабланилмаса ҳам бўлади", дейди Делицин.
Шунингдек, унинг қўшимча қилишича, ишчи кучи арзонлиги сабаб ишлаб чиқаришни Ўзбекистонда кўчириш Қозоғистондан кўра фойдалироқ бўлади. Аммо, экспертларнинг фикрича, аҳолисининг жон бошига тўғри келадиган даромади юқори бўлганлиги сабаб Қозоғистон бозорида LG маҳсулотлари сотуви яхшироқ бўлиши мумкин. Holodilnik.ru'нинг тижорат директори Алексей Погудалов ҳам LG Ўзбекистонга кўчиб кетишига шубҳа қилади, чунки Artel бўш жой имконияти мавжуд эмас. Таъкидлаш жоизки, Artel ишлаб чиқаришда Samsung билан ҳам ҳамкорлик қилади.
Агар "LG Россия" Ўзбекистонга кўчиб келадиган бўлса, компания музлатгичлар, кир ювиш машиналари ва телевизорлар ишлаб чиқариши айтилмоқда.
ЎҚИНГ: “ICT Week Uzbekistan – 2022” Ахборот-коммуникация технологиялари ҳафталигига бағишланган матбуот анжумани ўтказилди
