Яна Apple. Яна Дуров. Яна Telegram муаммоси.
Telegram'нинг сўнгги янгиланиши бир ҳафтадан бери Apple'нинг "кўриб чиқиш" жараёнида, дея хабар бермоқда мессенжер раҳбари Павел Дуров. Унинг қўшимча қилишича, купертинолик компания янгиланишни кечиктиришга нима сабаб бўлаётгани ҳақида ҳам хабар бермаган.
"Apple иловаларни 24 соат ичида кўриб чиқишини даъво қилади, лекин бу бизнинг тажрибамизда ҳар қандай маъно-мазмунли маҳсулот янгиланиши App Store'га етиб бориши учун камида 7-10 кун керак бўлади. Кичикроқ иловалар юритадиган дўстларимнинг айтишича, бу улар учун бунданда ёмонроқ, чунки улар шунчаки хатоликлар тўғриланишинигина Apple фойдаланувчиларга етказиш учун ойлаб кутишлари керак." дейди Дуров.
Бироқ, Дуровга кўра позитив ўзгаришлар яқин: Европа Иттифоқида Рақамли маркетинг қонуни кучга кирмоқда ва бу Apple, Google каби ўзининг бозордаги кучини суиистеъмол қилаётган "йўл тўсарлар"ни тартибга солади.
"Биз, дастурчилар, ўзимизни ва ўз фойдаланувчиларимизни ҳимоя қилиш учун ушбу қонунга суянишимиз керак. Агар сиз App Store ёки Google Play билан муаммоларга дуч келаётган илова дастурчиси бўлсангиз, бу ҳақда менга, [email protected] манзилига компаниянгизнинг электрон почта манзилидан сарлавҳасида "DMA" сўзи билан хабар беринг." дейди Дуров.
Telegram навбатдаги янгиланишида хабарлар силуети, топиклар, видеохабарларни транскрипсия қилиш ва бошқа ўзгаришлар қўшилиши кутилмоқда.
ЎҚИНГ: Telegram пулли постлари ортиқ iOS қурилмаларида кўрсатилмайди
