Энди Telegram'да SIM-картасиз аккаунт очиш мумкин!
Telegram яна ўзидан ўтиб тушди. Павел Дуров мессенжери навбатдаги янгиланиш билан хавфсизлик ва махфийликнинг янги даврига қадам қўймоқда. Қуйида кеча чиқарилган Telegram янгиланишидаги ўзгаришлар ва янгиликлар билан танишинг:
SIM-картасиз аккаунт очиш
Ҳа, энди сизга Telegram аккаунт очиш учун SIM-карта шарт эмас. Ушбу янгиланиш билан сиз Fragment платформасидаги блокчейн билан ҳимояланган аноним рақамлар орқали рўйхатдан ўтишингиз мумкин. Улар +888 билан бошланади ва уларни сиз fragment.com'дан энг камида 9 TON ёхуд 16 доллар атрофидаги нархга сотиб олишингиз мумкин.
Барча чатлар учун автоматик ўчириш таймери
Ушбу версия билан сиз аккаунтингиздаги барча янги чатлар ва гуруҳлар учун хабарларни автоматик тарзда ўчадиган қилиб созлаб олишингиз мумкин. Айтиш керакки, бу функция ёқилишидан аввалги чатлар учун амал қилмайди, бироқ сиз Созламалар > Махфийлик ва хавфсизлик > Хабарларни автоматик оʻчириш бўлимидан исталган чат учун хабарларни автоматик ўчадиган қилиб олсангиз бўлади.
Спамга қарши кучайтирилган ҳимоя
Кўпинча катта Telegram гуруҳлари админлари ўз гуруҳларида спамга қарши курашиш учун учинчи томон ботларидан фойдаланишади. Ушбу янгиланиш билан эса ботларга иш қолмайдиган кўринади ёхуд энди 200 дан ортиқ обуначига эга гуруҳ админлари Telegram'ни ўзининг алгоритмларига асосланган, янги Спамга қарши кучайтирилган ҳимоя функциясини ёқишлари мумкин.
Вақтинчалик QR-кодлар
Оммавий юзернеймга эга бўлган фойдаланувчилар аллақачондан бери ўз профилларини улашиш учун махсус QR-код ярата оладилар. Энди ушбу функция фойданаланувчи номига эга бўлмаганлар учун ҳам амал қилади. Фақат бунда QR-код ҳар беш дақиқада янгиланади.
Android учун иловада хотира ҳақида батафсил маълумотлар
Энди Android учун Telegram иловасидаги хотира созламалари ҳар бир чат қурилмада қанча жойдан фойдаланаётганини кўрсатиб туради.
Янги махсус эможилар
Премиум обуна фойдаланувчилар учун ҳам янгиликлар йўқ эмас. Ушбу версия ҳам 10 та янги эможилар тўплами ва яна бир нечта интерактив эможиларни ўз ичига олади.
Айни дамда янгиланиш барча учун тарқатилмоқда.
ЎҚИНГ: YouTube 2022 йилнинг энг зўр видеоларини эълон қилди!
