Расман: Xiaomi 13 ва 13 Pro моделлари тақдим этилди

Hasanboy
10241
12.12.2022 11:25

Xiaomi компанияси ўзининг иккита янги флагмани - Xiaomi 13 ва 13 Pro смартфонларини тақдим этди. Икки қурилма Qualcomm компаниясининг энг сўнгги ҳамда энг кучли чипсети ҳисобланувчи Snapdragon 8 Gen 2 билан жиҳозланган.

Смартфонларнинг камера техник кўрсаткичлари анча яхшиланган. Шунингдек, уларнинг дизайни ҳам етарлича ўзгарган. Икки модель фақат Хитой бозори учун тақдим этилди. Тез орада халқаро бозорга сотувга чиқади деган умиддамиз.

Xiaomi 13 Pro

Бу йилги катта моделнинг дисплейи ўзгаришсиз қолди. Ўтган йилги Xiaomi 12 Pro модели 6.73 дюймли дисплейга эга эди. Янги модель худди шу ҳажмли ҳамда техник кўрсаткичларга эга дисплей билан жиҳозланган. Бу ерда HDR10+ ҳамда Dolby Vision имконятларига эга бўлган 120 гертсли LTPO панел ҳақида гап кетмоқда.

Дисплейдаги ягона ўзгариш максимал ёрқинлик даражаси. Xiaomi 13 Pro дисплейининг ёрқинлик даражаси 1200 нит, шу билан бирга HDR видеони ижро этиш пайтида ёрқинликнинг энг юқори даражаси 1900 нитга етиши мумкин. Snapdragon 8 Gen 2 чипи LPDDR5X ва UFS 4.0 хотиралари билан интеграллашган.

Камера ҳақида сўз борар экан, смартфон орқа панелидан учта 50МП камералар ўрин олган. Бир дюймли Sony IMX989 сенсори Xiaomi 12S Ultra моделидан олинган. Leica бренди билан ҳамкорликда ишланган камера диафрагмаси f/1.9 бўлиб, у гипер оптик стабилизация билан жиҳозланган.

Телефото камера эса анча ўсишга эришган. Тўғри, у ҳали ҳамон 50МП, аммо зум яқинлаштириш уч мартага ошди. Ультракенг камерада эса ҳеч қандай ўзгариш йўқ. Аниқроқ қилиб айтганда, у ҳали ҳам f/2.2 диафрагмадаги 50МП камера. Ушбу камера макро ва автофокус имкониятига эга.

Аккумулятор ҳажми 4,820 мАс сиғимга ошган. Surge G1 чипи ёрдамида смартфон 120 ваттда симли, 50 ваттда эса симсиз қувватланиши мумкин. Шунингдек, у ўзидан 10 ватт тезликда қувват бериши мумкин.

Қўшимча фойдали функциялар қаторига Dolby Atmos функциясини қўллаб-қувватловчи стерео динамик, инфрақизил порт ҳамда IP68 стандартини мисол қилиб кўрсатиш мумкин. Аввалги моделларда сув ва чангдан ҳимоя қилиш стандарти бўлмас эди.

Қурилманинг оқ, қора ва яшил рангли турлари керамика билан ишланган орқа панелга эга. Кўк рангли моделнинг орқа панели эса чарм билан қопланган.

Хиаоми 13

Кичик моделнинг дисплей ҳажми 6.36 дюймга ошди. Аммо техник кўрсаткичлар ўзгармаган, яъни дисплей 120 гертс, 1080 х 2400 пиксел резолюцияда бўлиб, Dolby Vision, HDR10+ имкониятларини қўллаб-қувватлайди. Максимал ёрқинлик Pro модель каби 1900 нитни ташкил қилади. Аммо дисплей Pro моделники каби LTPO эмас.

Ушбу модель ҳам Leica брендидаги камералар билан жиҳозланган. Асосий камера резолюцияси 50 мегапикселни ташкил қилиб, у f/1.8 диафрагма ҳамда гипер оптик стабилизацияга эга. Иккинчи камера 3х оптик зумга эга бўлган 10МП телефото бўлса, учинчи камера сифатида қурилмага f/2.2 диафрагмадаги 12МП ультракенг камера ўрнатилган.

Xiaomi 13 модели 67 ваттда қувват олувчи 4,500 мАс сиғимли аккумулятор билан жиҳозланган. У, шунингдек, 50 ваттда симсиз қувват олиши ҳамда 10 ваттда ўзидан бошқа гаджетларга қувват бериши мумкин.

Оддий моделда ҳам Dolby Atmos функциясини қўллаб-қувватловчи стерео динамик, инфрақизил порт ҳамда IP68 стандарти мавжуд. Pro моделдан фарқли ўлароқ, оддий моделнинг орқа панели шиша билан қопланган. Унинг қора, яшил, кўк, кулранг, сариқ ва қизил рангли турлари тақдим этилди. Кўк рангли модель чарм қопламали панелга эга.

Икки қурилмага олдиндан буюртма бериш Хитойда 14 декабрь санасидан бошланади. Уларнинг нархи қуйидагича: