iPhone mini ортидан Apple яна бир моделдан воз кечади
Apple ҳар икки йилда ўзининг энг арзон смартфонини янгилаб туради. Охирги iPhone SE модели 2022 йилда тақдим этилганини ҳисобга олсак, унинг янги авлоди 2024 йилда сотувга чиқади. Бироқ машҳур таҳлилчи Минг-Чи Куо iPhone SE модели энди ишлаб чиқарилмаслигини айтмоқда.
Аввалроқ Куо тўрттинчи авлод iPhone SE моделини ишлаб чиқариш кечиктирилиши ёки умуман бекор қилинишини айтган эди. Энди эса таҳлилчи қурилма ишлаб чиқарилмаслигига ишончи комил.
Куонинг айтишича, Apple ўзининг биринчи 5G модемини айнан тўртинчи авлод iPhone SE моделига ўрнатмоқчи эди. Ушбу қурилмани ишлаб чиқаришдан воз кечилгандан сўнг, Apple яна Qualcomm компаниясининг 5G модемлари ёрдамига таянади.
Таҳлилчи Apple ўзининг 5G модемини iPhone 16 серияси тақдим этилишидан олдин уни iPhone SE 4 моделида синаб кўрмоқчи эканлигини айтди.
Учинчи авлод iPhone SE ўтган йилнинг март ойида тақдим этилган бўлиб, унга 5G тармоғини қўллаб-қувватловчи Snapdragon X57 модеми ўрнатилган эди. 2023 йилда тақдим этилиши кутилаётган iPhone 15 серияси эса Snapdragon Х70 модемига эга бўлади.
