Қандай қилиб яширин камераларни смартфон ёрдамида топиш мумкин?

Қандай қилиб яширин камераларни смартфон ёрдамида топиш мумкин?

Эҳтимол, сиз филмларда яширин камерали меҳмонхоналарни кўргансиз. "Бунақаси фақат киноларда бўлади" дейсизми? Туризм ривожланиши ва расмий, норасмий меҳмонхоналарнинг кўпайиши билан арзон камераларнинг жуда кўп миқдорда ишлаб чиқарилиши бир-бирига тасодиф эмаслиги кундек равшан. Бу сиз вақтинчалик яшаш учун банд қилган жой эгаси сизни 24 соат давомида кузатиб туриши мумкинлиги эҳтимолини оширади. Махфийлигингиз ҳурмат қилинишини хоҳлайсизми? Сиз турган меҳмонхона ёки бошқа жойда яширин камералар бор-йўқлигини билиб олишнинг бир неча йўллари бор (The Verge орқали).

Камералар камераларга қарши

Камералар қоронғи ёхуд ёруғлик паст бўлган жойларда тасвирга олиш учун инфрақизил нурлардан фойдаланади. Уни сиз кўра олмайсиз, бироқ смартфонингиз... Баъзи смартфонларнинг фақат селфи камераси инфрақизил нурларни кўра олса, баъзиларининг ҳам олди, ҳам орқа камералари уларни кўриш қобилятига эга бўлади.

Сиз буни телевизорингиз ёки бошқа турдаги пулт билан текшириб кўришингиз мумкин. Смартфонингиз камерасини очинг ва уни пултга қаратинг. Пултдан фойдаланганингизда сиз ундаги инфрақизил чироқни кўришингиз мумкин. У бинафшаранг ёки ўз номи билан қизил рангда кўзга ташланади (агар орқа камерангиз билан фойдаланган ҳолда ҳеч қандай чироқни кўрмасангиз унда олд камерангиз билан қайта уриниб кўринг).

Шундай қилиб, сиз энди вақтинчалик жойлашган хонангизда яширин камерага текшириш учун хонани иложи борича қоп-қоронғу қилишингиз керак, шундагина камеранинг инфрақизил нури ишга тушади. Кейин эса хонани аста-секин смартфонингиз камераси билан сканерланг. Агар ишлаб турган камера бўлса сиз уни топа оласиз.

Қўшимча дастурлар орқали яширин камераларни топиш 

Агар биринчи "финт"имиз иш бермаса ёхуд хонада камера бўлмаса ёки у инфрақизил билан жиҳозланмаган бўлса, унда камера бор-йўқлигини билиш учун локал тармоқни текшириш ёрдам бериши мумкин.

Иловалар дўконларида тармоққа уланган қурилмаларни топиб берадиган кўплаб анализатор дастурлар мавжуд бўлиб, улардан бири Fing ҳисобланади. Ҳам Android, ҳам iOS учун мавжуд бўлган илова орқали сиз тармоққа уланган қурилмаларни, ёхуд камераларни кўришингиз мумкин. Албатта, илова тармоққа уланган қурилма айнан камера эканлигини айтмайди. Буни сиз қурилманинг номидан билиб олишингиз мумкин бўлади.

Албатта, бу сиз синаб кўришингиз мумкин бўлган қизиқарли усуллар холос ва улар ҳар доим ҳам иш бермаслиги мумкин. Бироқ, агар бу масалада жиддий бўлсангиз, сизга радио частотаси детекторидан фойдаланишни тавсия қиламиз.

ЎҚИНГ: Сариқ девни минган Ҳошимжон Ghibli анимеси стилида

Сайт янгиликларидан доимий хабардор бўлиш учун Телеграм каналимизга қўшилинг!