Galaxy S23 Ultra iPhone 14 Pro Max'дан кучлироқми?

Galaxy S23 Ultra iPhone 14 Pro Max'дан кучлироқми?

Galaxy S моделлари ниҳоят барча бозорлар учун бир хил чипда тақдим этилди. Аниқроқ қилиб айтганда, Samsung ўзининг Exynos чипидан воз кечиб барча S23 моделларини фақатгина Snapdragon 8 Gen2 чипи билан жиҳозлади. 

Бу бошқа смартфонларга ўрнатилган 8 Gen2 чипидан фарқ қилади. Чунки у махсус Galaxy S23 моделлари учун ишлаб чиқарилган бўлиб, “Snapdragon 8 Gen2 for Galaxy “ деб номланди. 

Чипдаги CPU ва GPU қисмларининг унумдорлик даражаси оширилган бўлиб, бу бўйича S23 моделлари Snapdragon 8 Gen2 чипи билан жиҳозланган бошқа смартфонлардан яхшироқ натижа кўрсатиши керак. 

Galaxy учун мослаштирилган Snapdragon 8 Gen2 чипи CPU тузилиши бўйич оддий 8 Gen2'дан фарқ қилмайди. У битта Cortex-X3, иккита Cortex-А715, иккита Cortex-А710 ва учта Cortex-А510 ядроларига эга. Биргина фарқ асосий ядрода бўлиб, у оддий 8 Gen2'дан фарқли ўлароқ 3.2 гигагерцда эмас, балки 3.36 гигагерцда ишлайди. 

Худди шу ҳолат GPU'да ҳам кузатилади. Galaxy S23 моделларидаги Andreno 740 график процессорининг ишлаш тезлиги 680 мегагерцдан 719 мегагерцга оширилди. 

Ушбу ўзгаришлар смартфоннинг унумдорлик даражасини ошира олганини текшириб кўриш учун бенчмаркларга мурожаат қиламиз. Ушбу тестлар GSMArena сайти ижодкорлари томонидан амалга оширилган. 

Geekbench 5'нинг бир ядроли тестида S23 Ultra модели Red Magic 8 Pro ўйибоп смартфонини ортда қолдириб иккинчи натижани қайд этган. Бунга S23 моделидаги асосий ядронинг ишлаш тезлиги ошганини сабаб қилиб кўрсатиш мумкин. 

Кўп ядроли тестда эса Red Magic 8 Pro энди S23 Ultra'ни ортда қолдирган. Бунинг сабаби шундаки, кўп ядроли тестда асосий ядро иштирок этмайди. Бунда Red Magic смартфонининг совутиш тизими яхшироқ эканлиги унга устунлик берган. Geekbench'да ўтказилган икки тестда ҳам iPhone 14 Pro Max биринчи ўринни қўлга киритган.

AnTuTu тестида S23 Ultra яна Red Magic 8 Pro'дан ортда қолди. Умумий натижани оладиган бўлсак, Snapdragon 8 Gen2 чипи 8 Gen1+ ва A16 Bionic'дан тезкорроқ бўлиб чиқди. 

GPU унумдорлигини кўрсатувчи барча вазифаларда Galaxy S23 ва Red Magic 8 Pro моделлари қолган смартфонлардан анча устун эканлиги номоён бўлди. 

Демак, Galaxy S23 модели CPU синовларида S22 Ultra'га қараганда 30-35%, CPU ва GPU кучини кўрсатувчи AnTuTu 9 бенчмаркида тахминан 30% яхшироқ натижа кўрсатди. GFX Bench ва 3DMark GPU тестларида Galaxy S23 Ultra вақти-вақти билан унумдорликни икки баравар ошира олди. 

ЎҚИНГ: Galaxy S23 Ultra ва iPhone 14 Pro: қандай фарқлар бор? 

Сайтимизнинг энг чиройли расмларини Инстаграмдаги саҳифамизда томоша қилинг!